2024 UCL final : La Decimoquinta!

UCL match 151 khel thei Kroos

Kumin Champions League final-a Toni Kroos a inlan khan UCL-a match 151 a khelhna chiah a ni a, German player khel tam ber Thomas Muller nen an khelhzat a inang chiah.

Kroos-a'n football a chawlhsan dawn a, Bayern Munich academy-a a zirpui ṭhin Muller a la chawlh ve loh avangin season tharah erawh Real Madrid legend ai hian a khel tam ang.

Real thluak bur Perez

Real Madrid-in tun hnai kum 10 chhungin Champions League nomawi paruk an chawi a, an record hi a ropui hle. Kum 124-a upa Bayern Munich-in European Cup vawi ruk an chawi a, English club zinga record nei ṭha ber Liverpool pawh kum 131 ni tawhin vawi ruk tho an champion a, kum 124-a upa Barcelona vawi nga an champion bawk.

Los Blancos hlawhtlinna kawngah president Florentino Pérez hi a pawimawh bera chhal ngam a ni a, Real Madrid hmel tidanglamtu a ni. Season tharah Real hian tun dinhmuna khawvel player ṭha bera chhal Kylian Mbappe an la dawn bawk.

Mbappe chungchang zawhna chhangin Perez chuan, "Mbappe? tun hi player dang sawina hun a ni lo. Real Madrid hmalam hun sawi nan chuan nipui chhung zawng hun a la awm," tiin a sawi a, nomawi hlawhchhuahpuitu player-te a zah thiam hle.

Final khelh zawhah Perez hi Wembley Stadium dressing room-ah lutin player leh coach te a lawmpui.

Vawi ruk champion thei

Europe inelna sang bera champion nomawi chawi ngun ber record siamtu chu Real Madrid legend Paco Gento a ni a, kum 1956, 1957, 1958, 1959, 1960 leh 1966 khan European Cup-ah Los Blancos a champion pui.

Gento record hi Real player Toni Kroos, Dani Carvajal, Luka Modric leh Nacho Fernandes ten an nihrual a, Champions League-ah vawi ruk an champion. Kroos hian kum 2013-a Bayern Munich a champion pui bakah Real hi kum 2016, 2017, 2018, 2022 leh 2024 te khan an champion pui.

Carvajal, Modric leh Nacho te erawh Real tan vek nomawi an chawi a, Kroos-a'n Spanish club a zawm hmain kum 2014 khan Los Blancos hi an champion pui tel bawk a ni.

Real no. 8 thar tur Valverde

Real Madrid midfielder ropui Toni Kroos-a'n football khelh a chawlhsan dawn a, a jersey number 8 a awl dawn. Season tharah Federico Valverde-a'n Kroos number 8 hi a rochun ang.

Tun season-a number 15 hatu Valverde chuan, "Ka number hi nalh ka ti a, ka nupui phei chuan midang zawngin i number hi an duh ang, a ti. Real Madrid-a ka bul ṭanna number a ni a, thla rei lote hnuah ka thlak dawn," tiin Kroos-a number a hak tur thu a sawi.

Copa America-a Uruguay tana khel tur Valverde chuan sawi chhunzawmin, "Tunah chuan Champions League nomawi 16-na chawi tumin rilru kan siam ṭan der tawh," a ti.