Cristiano Ronaldo mittui a tla

Kings Cup-ah Al Nassr-in Al Hilal an hneh lo a, inkhelh banah team vanduai zawk innghahna Cristiano Ronaldo mittui a tla. King Abdullah Sports City-a inkhel hi a nung ṭha a, red card pathum ngawt phawrh a ni. Hun pangngaiah 1-1 a ni a, extra time-ah goal lut loin penalty shootout-ah Al Hilal 5-4 in an vannei ta zawk.

Zirtawpni zan inkhelah Aleksandar Mitrovic-a'n minute sarihna lekah Al Hilal tan goal hmahruai khung a, hemi hma hian Sadio Mane chuan chance ṭha bik a hlah.

Al Nassr an khel ṭha a, siphurh sut tumin an nawr na hle. Ayman Yahya leh Cristiano Ronaldo te an hmuhnawm a, mahse Al Hilal keeper Bono khelh ṭhat zan an tawng. Ronaldo vanneih an a ni lo a, second half-ah a bicyle kick mawi zet chuan goal ban a per a, goal-ah lut se a career-a goal ropui zingah a tel pha hial ang.

Al Hilal-in counter attack hmangin an nawrlet a, keeper David Ospina chuan box pawnah Malcolm a tihtluk vangin red card a hmu. Mahse, player 10-a khel Al Nassr goal bawh a na zel a, Mitrovic-a'n keeper chiah a hmachhawn hnua a khung loh avangin chak beiseina an nei ve zel bawk.

Minute 87-naah Ali Albulayhi-a'n ṭul lo zetin Al Nassr forward Ayman Yahya a titlua a, hnawhchhuah a ni. Throw in aṭanga ball kal chu Yahya hian a tauh goal zui a, 1-1 a ni. Kalidou Koulibaly-a'n keeper ball man tawh hnuah a pet fuh avangin hnawhchhhuah a ni leh a, Al Hilal-in player pakuain an khelh a ṭul phah.

Extra time-ah Al Nassr-in an tam zawkna an hmang ṭangkai thei lo a, chance ṭha an hlah hnem hle. Penalty shootout hmangin chak zawk zawn a ni a, Al Hilal tana pettu Ruben Neves-a'n hlah mah se Al Nassr tana pettu Alex Telles-a'n hlah.

Mitrovic leh Ronaldo ten an khung a, vawi nga pet zawhah 4-4 a ni. Sudden Death-ah Al Hilal tana pettu Saud Abdulhamid-a'n hlah mah se Ali Alhassan-a'n Al Nassr chakna goal a khung thei bik lo - Bono-a'n a dansak. Vawi sarih petnaah Al Hilal tana pettu Nasser Aldawsari-a'n khung laiin Al Nassr tana pettu Mehsari Al Nemer-a'n a khung lo - Bono thoin a dang. Al Hilal 5-4 in an vannei ta zawk.

Kum 39 mi Ronaldo-a'n Saudi Pro League-ah record thar siamin season khatah goal 35 khung mah se tun season-ah nomawi an chawi lo. Portugal captain hian inelna hi a la thutak tih a lantir a, inkhelh banah a mittui a tla hial. Ronaldo-a'n a hun hnuhnung lam a hmang chho a, Euro 2024-ah Portugal champion pui tumin Germany a pan ang.

Al Hilal erawh coach Jorge Jesus hnuaiah season ṭha bik an hmang a, Kings Cup-a an chak bakah hian Saudi Pro League-ah hneh loh nei loin an champion a, Super Cup-ah an chak bawk.