T20 World Cup-ah US an chak

T20 Cricket World Cup chu Pathianni zing khan khelh ṭan a ni ta a, United States chuan match hmasa berah Canada chu wicket sarihin an hneh. Grand Prairie Stadium, Texas-ah inelna thlengtu US tan Aaron Jones-a'n thi loin 94 runs a siam a, six vawi 10 zet vaw chhuakin hnehna an chan kawngah a ṭangkai hle.

USA hian inelna ṭan hmain Bangladesh 2-1 in an hneh thei a, April thla khan an ram ṭhenawm Canada chu 4-0 in an sawp. T20 World Cup hmachhawn turin US an inpeih a, chak tura rinkai zawk pawh an ni.

Ṭhumvawrah US an vannei a, vawm hmasak an thlang. Canada an che ṭha a, Aaron Johnson (23) leh Navneet Dhaliwal (61) te inkawpin 43 runs an siam hman. Nicholas Kirton (51) pawhin half century rawn siamin over 20-ah 194/5 runs an siam.

Canada-in target ṭha tak an chhawp thei a, US opener Steven Taylor-a'n run a siam lo a, a kawppui Monank Patel pawhin 16 runs bak a siam lo. Mualneitu hi chak lo thei dinhmunah an ding hman a, mah se Andries Gous (65) leh Aaron Jones (94*) te luh hnuah engkim danglam.

Gous hian 65 runs siam turin four vawi sarih leh six vawi thum a vaw chhuak a, ball 46 lek a mamawh bawk. Hming langsar ta ber erawh Jones a ni a, thi loin 94 runs siamin ball 40 chauh a siam. A strike rate pawh 235 a ni pha hial a, US chiang takin an chak ta zawk.

US hian over 17.4-ah 197/3 runs an siam a, ball 14 dah bangin hnehna an chang. Group A-ah hian USA leh Canada bakah India, Pakistan leh Ireland te an awm a, pahnih chauhin Super 10 an tlin dawn avangin inelna thlengtu US tan chaun hmabak a la thui hle.

Tukin zing dar 6:00 hian Namibia leh Oman an inkhel ang a, zanin dar 8:00-ah Sri Lanka leh South Africa te an inkhel ang. T20 Cricket World hi Star Sports kaltlangin a en theih a ni.