East Bengal coach thar Robbie Fowler

Liverpool fan-te banner lar tak pakhatah chuan, "Reds thinlung putute chu an eng a thawl e, pathian an hmuh tawh avangin," tiin a inziak a, hei hi Robbie Fowler chawimawi nana an tih a ni a, 'pathian' ang hialin an player ropui hi an ngai. 

Chutiang taka player ropui ni ṭhin Robbie Fowler chuan Indian Super League a rawn luhchilh dawn a, English striker ropui ṭhin hi East Bengal chuan kum hnih chhung atan an coach ni turin contract an ziahpui. 

Kum 45 mi coach hian a contract hi a ṭul dan a zirin kum khat dang pawhsei leh theihna dan a nei a, coaching staff pawh assistant coach atan Renedy Singh an ruat tih loh chu English mi deuh vek an ni!

Fowler chuan, "Coaching lama ka thu laimu ber chu midang el tura theihtawp chhuah hi a ni mai. A ṭha thei ang bera khelh kan duh a, result ṭha ber neih kan duh bawk," a ti a, India-ah chawl hahdam tura lokal mai mai a tum lo. 

Liverpool legend Fowler-a sulhnu hi sawi thui a ngai lo - Euro-pean football ngaina chin chuan a zinkawng ngaihnawm chanchin hi an hre vek. Reds-ah 1993-94 season khan a career ṭanin kum 2002 thleng a khel. 

Merseyside club tana a season hmasa berah match 34 khelin goal 18 a khung thei a, mimal anga season khata goal a khung hnem ber ṭum chu 1995-96 season kha niin  match 53-ah goal 36 ngawt a khung - khatihlai khan season khata goal 30 khung tling thei striker chu kut zung ṭang thliaka chhiar tham lek an la ni. 

Liverpool tana a career hmasa lamah hian match 330 khelin goal 171 a khung a, kum 2006 a Anfield lama kir khan season khat leh a chanve chamin match 39 khelin goal 12 a khung bawk. Reds tan hian FA Cup (1), League Cup (2), UEFA Cup (1) leh UEFA Super Cup-ah a champion a, Champions League final a khel bawk. 

Fowler hian Leeds United, Man-chester City, Cardiff City, Blackburn Rovers, North Queensland Fury, Perth Glory leh Muangthong United tan a khel bawk a, tawnhriat a nei ṭha hle. 

Fowler hian khelmual chhungah tawnhriat nei ṭha mah se coaching lamah erawh uang thei a la ni lo. 

Kum 2011 khan Muangthong United tana a khelh laiin season laihawlah player-manager hna chelhtir a ni a, Thai Premier League club hi pathumna niin season a kharpui. 

April 2019 - June 2020 inkar khan A League club Brisbane Roar FC a enkawl bawk a, league round-ah palina nihpuiin January leh February khan Coach of the Month-ah thlan a ni hial.

Fowler hian coaching lamah tawnhriat a nei tam lo a, a hna thawh chhunah erawh a thawk ṭha hle - East Bengal thuneitute pawhin hei vanga ruai ngam an niin a lang a, result an beisei ang. 

English coach chuan, "Australia lama kan tawnhriat kha rawn chhawm kan tum a ni. Table mawngphah chung chiaha awm team enkawlin bul kan ṭan a, a dik zawnga inelna hmachhawn turin kan chher a ni. Nasa takin hma kan sawnpui a, chutiang taka hnathawh leh chu kan tum," a ti. 

Indian Super League club tam zawkin training an nei ṭan tawh a, East Bengal erawhin coach thar an puang ve chauh - player contract la chinfel loh tam tak a awm a, ram pawn player sawi rikte pawh tunah rih chuan thuthang leng vek an la ni rih. 

Fowler chuan, "Hlawhtlinna chan harsatzia ka hria a, team tam zawkin training an ṭan tawh bawk. Club neitu lamah chinfel lawk theih loh a awm avangin mi dang zawng aiin kan muang a, contract pawh kan ziak lawk thei lo. 

"Mahse, kan ṭhat dan berin khelh kan tum ang. Theihtawp chhuah turin player-te kan beisei dawn a, a harsa ang tih chu ka hria. Mahse, a pawimawh hmasa ber chu mi dang el phak tura inbuatsaih a ni a, result ṭha tak hlawh chhuak turin kan bei ang," a ti. 

Fowler chuan a coaching staff zinga Indian awmchhun Renedy Singh fak zuiin, "Renedy hi player ṭha tak a ni ṭhin tih kan hria a, coach ṭha tak a ni zui tih pawh kan hria," a ti a, Manipur coach chungah a beiseina a sang hle. 

ISL club zingah East Bengal chiah hi tun season atana ram pawn player la lalut lo awmchhun an ni a, ISL-ah hian club pakhat tan ram pawn player pasarih neih theih a ni - pakhat erawh Asian player an nih ngei a ngai thung. 

ATK Mohun Bagan, Hyderabad FC leh Odisha FC chu ISL club zinga ram pawn player nei kim tawh an ni a, Mumbai City tih loh club dang zawngin ram pawn player panga an nei tling tawh bawk. 

Hetiang boruak karah hian East Bengal hi ram pawn player nen sawi zawm nual an ni a, Norwich City winger hlui Anthony Pilkington, Brisbane Roar a Fowler hnuaia lo khel tawh right back Scott Neville, Southampton defender hlui Danny Fox, Aston Villa striker hlui Rudy Gestede leh Sunderland striker hlui Anthony Stokes-te hming pawh a ri. 

East Bengal-in Fowler meuh lalut turin pawisa an nei tawk a, an sawi zawm player-te hi an duh tak tak a nih chuan lalut turin sumah buaina a awm a rinawm loh - Barcelona attacking midfielder hlui Ibrahim Afellay hming pawh lam rik a ni.

•    November-ah khelh ṭan tur a ni a, March 2021 thleng a awh ang. 

•    Covid-19 vangin inelna hi hmun khata neih tur a ni a, Goa-in a thleng dawn. 

•    Team 11 an inel dawn a, East Bengal bakah hian ATK Mohun Bagan, Mumbai City FC, Odisha FC, NorthEast United, Hyderabad FC, Bengaluru FC, Chennaiyin FC, FC Goa, Kerala Blasters leh Jamshedpur FC-te chu ISL team an ni. 

Kum 45 mi coach hian player a nih laiin Everton, Manchester City leh Burnley tan a lo khel tawh a, Blackpool-ah East Bengal set piece coach thar Terence McPhillips hnuaiah assistant-in a coaching career a ṭan a,  Brisbane Roar-ah Fowler-a assistant a lo ni tawh bawk. 

Kum 52 mi McPhillips hi Indian football a set piece coach hmasa ber a ni a, English club lar Blackburn Rovers-ah academy staff zinga telin bul a ṭan - a hnuah head coach Gary Bowyer hnuaia assistant coach lailawkah ruat a ni. Bowyer-a'n Blackpool a pan hnuah assistant ni turin a zui a, Bowyer-a chhuah hnuah coach lailawk ni zui zetin a hnuah Blackpool coach nghet a ni. 

Player a nih laia Everton, Tottenham Hotspurs leh Blackburn Rovers te tana goalkeeper ni thei ni a, Rovers tana a khelh lai hian Alan Shearer leh Kevin Gallacher-te nen Kenny Dalglish hnuaiah an khel ho hman. Wolverhampton Wanderers, Oldham Athletic, West Ham, Blackpool, Bolton, Hull City, Bahrain leh Bangladesh-ah te goalkeeping coach a lo ni tawh a, ISL-ah Jamshedpur FC leh ATK tan goalkeeping coach a lo ni tawh bawk.

Bury FC leh Macclesfield Town tana lo thawk tawh a ni a, East Bengal tan hna ṭangkai thawk turin tawnhriat a ngah ṭha tawk. 

Indian footballer hlawhtling ber pawl a ni a, East Bengal atana season nga a khelh avangin Kolkata Club hrechiangtu a ni. India tan vawi 72 inlan in, goal 12 a khung a, inkhelh a chawlhsan hnuah Pune City FC assistant coach leh Neroca coach a ni tawh a, Classic Football Academy-ah technical director a ni tawh bawk.

Premier League club lar Newcastle United-ah kum 10 chuang zet head physio hna a lo chelh tawh a, tawnhriat a nei tha hle.

Walsmley hian Sports & Performance-ah degree a nei a, English club lar Preston North End Under 18 tan kum hnih chhung analyst hna  a thawk a, a hnuah senior team tan performance analyst hna thawk turin promotion pek a ni.