Harsa takin Djokovic a chak hram

Novak Djokovic chuan French Open nomawi humhim a tum a, kawng erawh a hautak chho ta hle. World number 1 hian Lorenzo Musetti lakah fiahna hautak a hmachhawn a, set nga an khelh hnuah a vannei zawkah a ṭang hram.

France ramah chuan Djokovic leh Musetti te inkhelh zawh hun hi Pathianni zing lam dar 3:07 a ni hial a, darkar li leh minute 29 zet an inkhelh hnuah 7-5, 6-7(6), 2-6, 6-3, 6-0 in a chak zawkah a ṭang a, last 16 a inhlangkai.

Seeded pakhatna Djokovic hi a tlak mai rinna pawh a lian hman hle, mahse set lina aṭangin a theihna tak tak a pho lang chauh emawni tih mai tur a ni a, a tir lam a khelh dan erawhin a duhthu a sam lo ve hle ang tih a rin theih.

Kum 37 mi Djokovic chuan, "Ka khel ṭha hleah ka ngai a, keimah ang bawkin Lorenzo kha a khel ṭha hle bawk. Grand Slam a nih tawh hi chuan hetiang inkhel hmuhnawm leh boruak sang hi chu a awm ve tur pawh a ni.

"A nihna tak sawi chuan a hmuna inkhel entute vanga chak ka niin ka hria, set hnih ka hloh kha chuan rilru a fim lo ve deuh. Entu ten ka hming an lam a, theihtawp chhuah tura an au lauh lauh khan chakna min siamsak," tiin inkhel entute pawimawhzia a sawi bawk.

Inkhel dangah Alexander Zverev pawhin fiahna a paltlang. World number 4 hian a khingpui Tallon Griekspoor nen set nga an khelh hnuah 3-6, 6-4, 6-2, 4-6, 7-6(3) in a chak zawkah a ṭang a, third round a paltlang ve bawk a ni.

German tlangval hian a match hmasa pahnihah set a hloh lo a, a vawi khat nana Grand Slam champion nih beiseina pawh a sang hman, tunah erawh thil a awlsam lo tih a takin a lang leh ta, seeded 13-na Holger Rune nen an inkhel leh ang.

Seeded pangana Daniil Medvedev pawh a la chak zel - Russian tlangval hian Tomas Machac chu 7-6(4), 7-5, 1-6, 6-4 in a hneh a, season dang ang lo takin clay court-ah a khel a nghet rih hle, thil mak a beisei chhunzawm zel ngei ang.

Medvedev chuan, "Inkhel hautak tak a ni, a lawmawm lai chu clay court tournament match hautak ka khel thei tih a taka ka lantir kha a ni. Kan inhnehtawk em em mai a, a tawpah a vannei zawkah ka ṭang hram," a ti.

Mipa singles inkhel dangah Felix Auger-Aliassime pawh a chak. Canadian star hian Ben Shelton chu 6-4, 6-2, 6-1 in a hneh a, nizan khan seeded pathumna Carlos Alcaraz nen inkhel zui lehin result erawh kan hre hman lo.