Makhachev hmaah Poirier a tlawm

Nimin khan Islam Makhachev chuan Dustin Poirier a hneh a, Poirier hi round nganaah 'd'arce choke' hmangin a tlawm - Makhachev hian UFC lightweight title a kawl lai chu a humhim a, vawi 27 fight a hmachhawna vawi 26 a chakna a ni. Vawi khat a tlawm ve tawh.

Prudential Centre, New Jersey-a neih UFC 302-ah fighter pahnih an inngam viau a, MMA fighter ropui zinga chhiar tel ni ṭhin Poirier pawhin a ngam hle - a tawpah erawh kum 32 mi Makhachev a chak a, a vawi thum nan a title a humhim leh ta.

Hetihlai hian kum 35 mi Poirier erawh fighter ropui ber pawl ni siin, title a hlawh chhuak hleithei lo a, fight chawlhsan lam a sawi zui. Poirier chuan, "Fighter ṭha ber ber hmachhawn turin ka ṭha tawk tih ka hria a, mahse, fight hmachhawn leh ta ila, engemaw ka beisei chuang le?" a ti.

Poirier hian vawi 40 zet fight hmachhawn tawhin, vawi 30 a chak a, vawi kua tlawmin, vawi khat chu 'no contest' a puan a ni - kum 2021 khan UFC fighter ropui Conor McGregor chu a zawnin a hneh tawh.