Queen pianchamah Rashford chawimawi dawn

England leh Manchester United forward Marcus Rash-ford chu Queen pianchama chawimawi tur hming tarchhuah zingah a tel a, kum 22 mi footballer hi Member of the Order of the British Empire (MBE) nihna pek a ni ang.

Kumin nipuiah khan England-ah school naupang tana chhun chaw a thlawna pek chu coronavirus vanga buaina an neih avangin tihtawp a ni a, naupang maktaduai 1.3 in harsatna an tawh phah. Rashford hian naupang hoin an chanvo an neih let leh theih nan hma a la a, prime minister Boris Johnson hnenah a dilsak.

Rashford-a ngenna a hlawhtling a, naupang hoin ei tur a thlawnin a dawng leh a, an thil dawn hi kar khatah £15 (Rs 1428) man hu a ni. English forward hian hetah hian duh tawk mai loin UK-a ei tur zuar dawr lian tak tak te chu thawh ho puiah a sawm a, naupang retheite puih hna hi a chhunzawm.

Manchester United forward Rashford chuan, "MBE ka ni tur hi a lawmawm ka ti a, chutihrualin ka thil tum ti hlawhtling turin bul ka ṭan chauhah ka ngai. Ka tan chuan chawimawina hlu tak a ni a, ka nu hian kei aiin chawimawina hi a phu zawkin ka hria," tiin naupang reithei zawkte tana thawh chhunzawm zel a tum thu a sawi.

United Kingdom-ah hian kum khat chhungin vawi hnih chawimawina hlan ṭhin a ni a, chawimawina hrang hrang a awm. 

Chawimawina dawng tur hi thlan chhuak tur hian committee hranpa din a ni a, committee thutlukna hi prime minister-in en lehin a tawpah Queen in a endik.

Chawimawina hrang hrang te chu Companion of honour, Knight or Dame, CBE, OBE, MBE leh BEM te an ni.

Companion of honour : Arts, science, medicine emaw sorkar hna thawk ṭhate hnenah hlan ṭhin a ni. Kum 1917 khan George V-in chawimawina hi a hmu chhuak a, an hming tawpah 'CH' an dah ṭhin.

He chawimawina dawng tawh hming langsar te chu Sir Winston Churchill, JK Rowling leh Sir David Attenborough te an ni.

Knight or Dame : Medieval hun lai aṭang tawhin knighthood chawimawina hi an pe ṭan tawh a, Lal emaw Lalnuin ngunhnamin an khawih ṭhin. He chawimawina dawng mipa chu Sir tih an ni a, hmeichhe erawh Dame tih an ni thung.

CBE : Commander of the Order of the British Empire (CBE) hi King George V-in Indopui pakhatna hun laia a duan chhuah a ni a, Order of the British Empire award zinga a sang ber a ni.

OBE : Officer of the Order of the British Empire (OBE) hi British Empire award zinga a sang ber dawttu a ni.

MBE : Member of the Order of the British Empire (MBE) hi CBE leh OBE hnuaiah a awm a, British Empire award-ah pathumna a ni.

BEM : British Empire Medal (BEM) hi kum 1917 khan tih ṭan a ni a, sipai leh civil mi te a huam vek. Kum 1993 khan tih tawp a ni a, kum 20 hnuah prime minister David Cameron-a'n rawn ṭan ṭha lehin kum tinin khawtlanga tana thawk ṭha mi 300 vel hnenah hlan ṭhin a ni.