French Open Champion lai Wawrinka chak hram

Kumina Grand Slam tourna-ment pahnihna French Open chu May 22 aṭang khan Stade Roland Garros-ah khelh ṭan a ni leh ta a, mipa champion lai Stan Wawrinka chuan a match hmasa berah harsa takin hnehna a chang hram. Inkhel hi True Vision (Fox Sport)-ah live a en theih a ni.

Thawhṭanni zana inkhelah Swiss thiampuipa Wawrinka hian world number 59 Lukas Rosol chu darkar thum leh minute 11 chhungin 4-6, 6-1, 3-6, 6-3, 6-4 in a hneh hram. Kum 30-a upa Rosl hian 2012 Wimbledon second round-ah beisei loh takin Rafael Nadal a lo hneh tawh nghe nghe a, kuminah erawh a vannei nawn ta lo.

French Open-ah hian kum 1957 khan champion lai Australian Lew Hoad chu first round-ah a lo tla tawh a, hemi hnuah tun thlengin champion lai first round-ah an la tla leh ngai lo. Seeded pathumna Wawrinka hian nikum khan final-ah world number 1 Novak Djokovic hnehin champion nomawi a lo chawi tawh a, kum 2014 khan Australian Open-ah a lo champion tawh bawk.

Grand Slam vawi hnih chanpion tawh Wawrinka chuan, "Inkhel hautak tak a ni, set lina leh set ngana kan khelh thleng khan a tisual ṭha duh lo hle. Ball a vuak nat bakah a rawn vaw let ṭha thei hle. Beidawng duh loa ka beih hram hram avangin a tawpah a vannei zawkah ka
ṭang," tiin inchhuang thei a nih bik loh zia a hai lo.

World number 2 Andy Murray chu mipa chak lo langsar hmasa ber a ni hman teuh hle. Italian Open champoion hlim Murray hian Radek Stepanek lakah set hmasa pahnih chu 6-3, 6-3 in a hloh nghal a, set thumna 6-0 a la letin set linaah pawh 4-2 in hma a hruai leh a, mahse eng (light) a ṭhat loh avangin an inkhelh hi tihtawp lailawk a ni. Nizan khan khelh chhunzawm leh niin result kan hre hman lo.

Mipa dang

Seeded pangana Kei Nishi-kori chu Italy tlangval Simone Bolelli lakah 6-1 7-5 6-3 in a chak a, seeded pariatna Milos Raonic pawhin ATP ranking-a 10-na te pawh lo hauh phak tawh Janko Tipsarevic chu 6-3, 6-2, 7-6 in a hneh ve bawk. Tipsarevic hi player beiseiawm tak ni mah se hliam vangin a buai ngun em em a, Roland Garros-ah hian kum 2013 hnua a inlan lehna hmasa ber niin tunah hian ATP ranking-ah 680-na a ni!

Player langsar dangin hnehna an chan laiin 2014 US Open champion Marin Cilic erawhin second round a lut zo lo thung. Seeded 10-na Cilic hi seeded pawh chang phak lo Marco Trungelliti lakah 7-6, 3-6, 6-4, 6-2 in a chak lo.

Radwanska chak

Hmeichhe single lamah champion tura rinkai ni phak Agnieszka Radwanska chuan first round-ah game hnih chiah a hloh a, seeded pahnihna hian darkar khat leh minute thum chhung chauhin Bojana Jovanovski chu 6-0, 6-2 in a sawp.

Seeded palina Garbine Mugu-ruza chuan fiahna a hmachhawn nghal thung a, set khatna a hloh zet hnuah 3-6, 6-3, 6-3 in Anna Karolina Schmied-lova a hneh. Inkhel dangah 2014 finalist Simona Halep chuan Nao Hibino hnehin second round a inhlangkai ve bawk.

French Open hi...

Kum 1891 khan khelh ṭan a ni a, a tirah chuan mipa tan chauha tih niin champion hmasa ber chu H. Briggs a ni. Kum 1897 aṭang khan hmeichhia telh ṭanin champion hmasa ber chu French Tennis player Adine Masson-i a ni thung.

Inelna neih a nih aṭanga kum 34 chhung chu French mite tan chauh a tel theih a, mah se kum 1925 aṭang khan tournament huam chin ti zauin ram dang mite tan pawh a tel ve theih. A tirah chuan he tournament hi Paris a tennis court hrang hrangah khelh kual ṭhin niin kum 1928 aṭang khan khelhna bik neiin Stade Roland Garros-ah khel ṭhin a ni.

Clay court-ah hian tennis ball hi a kal chak vak lo a, service na tak tak leh volley na tak tak tura ngaih pawh rin aiin ball a kal na tawk lo ṭhin. Gross court leh Hard court te nena khaikhin chuan a ball kal vel a chak loh bakah a sawt sang duh hle. Hetianga court dang nena ball kal dan a inan loh em avang hian tennis player ropui tak tak pawh an lo hlawhchham fo tawh a ni.

Pete Sampras kha Grand Slam 14-ah champion thei mah se French Open bikah hian kum 1996 a semifinal a luh bak a thleng sang ngai lo. Final phei chu vawi khat mah a lut lo hial! Sampras ang tho hian player ropui tak tak John McEnroe, Frank Sedgman, John Newcombe, Venus Williams, Stefan Edberg, Louise Brough, Martina Hingis leh Virginia Wade te chuan French Open champion nomawi hi an chawi miah lo!

Player tam tak tan inkhelh harsatna hmun ni mah se ball vaw na lo leh ball vaw vir thiam tan chuan hmun ṭha a ni ve thung. Baseline aṭanga ball vaw thiam bik Rafael Nadal, Bjorn Borg, Ivan Lendl, Mats Wilander, Justine Henin leh Chris Evert te tan chuan he hmun hi hmun duhthusam a ni ve thung a ni. Grand Slam vawi 14 champion tawh Nadal hi French Open bikah hian ṭum kua champion tawhin sulhnu nei ṭha ber a ni mek.

Player ropui zinga Rod Laver, Jan Kodes, Bjorn Borg, Andre Agassi, Rafael Nadal leh Roger Federer te chauh hi Wimbledon leh French Open champion kawp thei an ni.

Kuminah hian Grand Slam vawi 17 champion tawh Federer hi a hnungzâng na vangin a inlan thei lo a, Federer hian tun hnai Grand Slam match 65 zet chu khel thei mah se tun hnaiah a khup leh hnungzâng na vang hian a buai ve ta fo mai.