Bayern-ah Hummels lut fel ta

Bayern Munich chuan defender Mats Hummels chu kum nga chhung atan Borussia Dortmund aṭangin an lalut fel ta, tun thla tir khan inremna hi awm tawh mah se Thawhṭanni khan contract hi an ziak fel chauh a ni.

Kum 27-a upa Hum-mels hian tun hmain Bayern tan a lo khel tawh ṭhin a, Allianz Arena-ah a mikhual vakin a rinawm loh. Pathianni zana Ger-man Cup final an khelh kha Dortmund kawr a hak hnuhnun a ni ta. Germany international Hummels man zat hi tarlan ni chiah lo mah se pound maktaduai 30 vel nia sawi a ni.

Hetihlai hian tun hnaia Liverpool nena an sawi zawm Mario Gotze chuan tun nipui transfer wimdow inhawn hunah pawh Bayern chhuahsan a tum loh thu a sawi.

Kum 23-a upa Mario Gotze hian Pep Guardiola hnuaiah hmun nghet a chang phak meuh lo a, tun season-ah hliamin a tibuai bawk nen Bundesliga match 11-ah chiah inkhel bul a ṭan. League title a zawna vawi li an lak theih nana player rinrawl ni lo mah se Euro 2016 khel tur Germany preliminary squad-ah erawh a hming a la lang thung.

Season thar aṭang chuan Real Madrid leh Chelsea pawh lo enkawl tawh Carlo Ancelotti-a'n Bayern hi a enkawl tawh dawn a, Italian manager hnuaiah hian Gotze hian hmun nghet chan theih a inbeisei a ni.

Season thar thlirin Gotze chuan, "Munich-a season thar ka hman dan tur ka ngaihtuah leh der tawh a, Carlo Ancelotti enkawlna hnuaiah a
ṭha thei ang bera khel chhuak turin a ni hmasa ber aṭangin theihtawp ka chhuah ang," tiin a sawi.