A lungthu kim nan MPL nomawi ka duh - AFC president

Nimin khan Northeast Cosultancy Services (NECS) chuan Chaltlang Tourist Lodge-ah tun season chhunga Aizawl FC hlawhtlinna an lawm sak a, player-te chawimawina hun neiin chaw hlui an kilho nghal.

Aizawl FC president Robert Romawia Royte chuan, "Tun season chhungin I Day Football inelnaah mipa leh hmeichhia kan champion a, Mizoram chhunga inelna sang ber MPL champion kan ni bawk. Rest of India Zone-ah kan Under 15 leh Under 18 te an champion a, kan senior team-te Federation Cup-ah pahnihna an ni. Kan thil tawn hi club pakhat hlawhtlinnaah chuan a chhuanawm hle a ni," tiin season ṭha tak an hman thu an sawi.

An hmachhawp sawiin Robert Romawia chuan, "I League-ah pariatna kan ni a, kan hnuaiah DSK Shivajians an awm - kan vanduai a ni. AIFF-in kan hmalam hun an la tichiang lo a, keini chuan I League season tawp ber khelh hi kan la beisei reng a ni. Kan hma lawkah hian Durand Cup a awm a, I League-a pariatna thleng khelh tur niin sawmna kan hmu tawh a, foreign club, Services leh Railways te pawh khawvela football inelna upa ber pathumnaah hian an sawm a rinawm bawk. November thla hian National Women League a awm dawn a, sawmna kan hmu tawh a, champion ngei kan tum," tiin a sawi a. Mizo zinga I League hmasa ber president hian Myanmar leh Nagaland-ah football academy din tura hma-lakna an neih thu a sawi bawk.

MPL5 sawi kaiin Aizawl FC president chuan, "MPL-ah vawi hnih kan champion zawn tawh a, Mizo chuan lungthu kim hi kan duh ṭhin. Kan technical staff-te pawh tawi te chiang tak siin champion tur team siam ngei turin ka hrilh tawh," tiin a zawna vawi thum champion ngei an tum thu a sawi.

Hlawhtlinna chu

Aizawl FC U15 : Rest of India Zone-ah Neroca FC, Gangtok Himalayan leh NRL SPT te hneh vekin Aizawl FC-in I League U15-ah final round an lut. Final Round-ah Sporting Goa leh Bengaluru FC te hneh mah se United SC lakah 1-0 in an chak lo a, an goal khat chhuah hi vanduai puiin palina an ni.

Aizawl FC U18 : ADFA First Div League-ah Aizawl FC U18 in league round-ah hneh loh an tawng lo a, final-ah Chhinga Veng lakah vanduaiin pahnihna an ni. MPL U18-ah Aizawl FC hian hun rei zawk league round-ah hmahruaitu ni mah se final an lut pha lo.

I League U18-ah Aizawl FC hian Neroca FC U18 leh Gangtok Himalayan SC U18 hnehin final round an lut. Aizawl FC hi Group B-ah awmin Salgaocar, Pune FC, Royal Wahingdoh leh East Bengal nen awm hoin semifinal an thleng a, champion zui ta AIFF Elite Academy an hneh lo. Mizo club hian third place-ah league round-a an hneh tawh Salgaocar hnehin loin palina an ni.

Aizawl FC : Aizawl FC senior team-in season ṭan nan I Day Football-ah nomawi an chawi nghal a, MFA Super Cup-ah erawh Bethlehem VT an hneh lo. MPL-ah Aizawl FC-in nomawi an chawi zui a, champion zawn hmasa ber an ni. I Day Football-ah hian Aizawl FC hmeichhe team an champion bawk.

I League-ah Aizawl FC hi pa-riatna a ni a, India ram league sang berah relegate mah se Federation Cup-ah final an lut phaa Mohun Bagan hneh loin pahnihna an ni.