NBA Playoff Cavaliers an chak lo nawn

Nimin zing khan NBA Eastern Conference Finals Game 4 khelh a ni a, match hmasa pahniha hnehna chang zo lo Toronto Raptors chuan Cleveland Cavaliers lakah 105-99 a hnehna changin series-ah 2-2 chiah a ni ta! Ningani zing dar 6:00-ah Game 5 an khel leh ang.

Air Canada Centre-a inkhelah Raptors tan Kyle Lowry a khel ṭha hle a, point 35 score-in DeMar DeRozan (32) leh Bismack Biyombo (14) te chu hnehna an chan theih nana sulsutu an ni.

Inkhel bul ṭan phat aṭanga a tawp thlengin Raptors an ṭang mar pat reng a, quarter hnihna an khelh laiin piont 18 zetin an sang fal a, hei hi an point inthlauh lai ber a ni. First half-ah point 16 a sang zawk chungin chawlhlawk an hmang a, a tawp thlengin an hnungtawlh tawh lo.

Raptors hi an game hmasa pahnihah an chak loh nghal avangin NBA Finals khelh an beiseina a chau hman hle a, mah se Game 3-ah 99-84 a hnehna an chan hnuah Game 4-ah pawh an chak ve leh takah chuan beiseina an nei sang tawh hle ang.

Game 4 an khelh hma hian LeBron James chuan hnehna an chan theihna tur ruahmanna ṭha tak a neih bakah an team tan hnehna chanpui tham a nih a beisei thu a sawi. Mahse, Power forward hian court-ah minute 46 hmun a hman chhungin point 29 score-in rebound vawi kua a lak bakah aasists vawi ruk nei mah se a team a chak pui zo lo.

Kum 30-a upa James hian playoff bikah a zawnin match 22 zet chu point 20 a score tling ziah a, mah se tun hnaiah a zawnin match 12 chhung point 30 a score tling ta lo thung. A career-ah playoff bika point 30 score tling loa a kal zawn rei lai ber a ni hial.