Euro khel lo tur Pirlo leh Balotelli

Italy chuan Euro 2016 an khelh tur pualin squad an puang ve leh ta a, player 30 koh chhin zingah New York City midfielder Andrea PirloAndrea Pirlo leh AC Milan striker Mario Balotelli tan hmun a awm lo.

Kum 37-a upa Pirlo hi September thlaa Bulgaria nen Euro qualifying an khelh hnuah ram tan koh a la ni leh lo. Major League Soccer lamin ngaih pawimawh a hlawh tawk lo niin a lang a, MLS lama Pirlo ang thoa khel Sebastian Giovinco chu player langsar koh loh zingah a tel bawk.

Premier League lama player kan hmelhriat zingah West Ham defender Angelo Ogbonna, Manchester United full-back Matteo Darmian leh Southampton striker Graziano Pelle-te chu koh zingah an tel a, player hi pasariha la tih hniam leh tur niin May 31-ah tih chian tur a ni.

Chelsea boss thar tur An-tonio Conte kaihhruaina hnuaia khel tur Italy hi Group E-ah awmin Belgium, Sweden, leh Republic of Ireland-te nen an inhmachhawn ang.

Balotelli a chuai

Manchester City striker hlui Balotelli hi khawvel striker beiseiawm ber pawl nia sawi ṭhin ni mah se kum 2014-a Liverpool a zawm hnuah beisei a phak lo a, a vanglai a hman hma hauhin a chuai der!

Kum 25-a upa striker hian Reds a pan hnuah match 28 inlanin goal li chiah a khung a, harhtharna a chan theih beiseiin a club hlui AC Milan lamah a kir. Milan-ah pawh Balotelli-a'n hmana a thiamna ang kha a chhar chhuak tawh lo.

Italian striker hi hliamin a lo ti buai ve reng bawk nen tun season-ah Milan tan inelna hrang hrangah match 23 chiah a inlana, goal thum chiah a khung! League-ah phei chuan goal khat chiah a khung a, Italy squad-a koh a ni lo hi a awm lo hran lo.

Pirlo a tar tawh?

Andrea Pirlo-a'n nikum nipui transfer laia Juventus a chhuahsan hmain Italian club hi Serie A leh Coppa Italia-ah te champion puiin Champions League final a luhpui bawk a, an player langsar ber pawl a ni.

Khelmual chhungah Pirlo-a'n a kum tam tawh mah se a la tar lo tih tarlang fo chungin football chawlhsan hnai tawhte khelhna tur nia ngaih Major League Soccer lam a pan a, tuna a lan dan chuan veteran midfielder hian a ti fuh lo niin a lang.

Italy tan vawi 116 a inlana goal 13 khungtu midfielder hi goal khungtu ropui ni lo mah se ṭhiante goal khung tur siamsak kawngah leh midfield khaikhawm kawngah a langsar ṭhin. New York City a pan hnuah match 23 khel tawhin goal a la khung lo a, karhmasa lawka New York Red Bulls laka 7-0 a an tlawm ṭumin inkhel bul ṭantu zingah a tel.

Giovinco lo kiang rawh le

Major League Soccer player zinga Kaka dawta hlawh hnem ber dawttu Sebastian Giovinco koh a ni lo hi sawi zui hlawh zinga mi a ni. Kum 29-a upa striker hian kum 2015-a MLS lam a pan hnuah Toronto tan match 46 khel tawhin goal 31 a khung a, MLS-ah player langsar ber pawl ni mah se Euro 2016 squad-ah koh a nih phah chuang lo.

Training Camp

Italy hian kar hmasa khan squad puan a nih hmain training camp an buatsaih a, player engemaw zat an ko khawm. Pirlo leh Giovinco hian MLS match khelh tur an neih avangin training camp hi an chhim lo a, Antonio Conte-a'n player pahnih hian training camp chhim lo mah se Italy squad-ah hmun an la chan theih tho thu sawi mah se koh an ni ta chuang lo a ni.

Training camp chhim tura koh zingah Sunderland striker Fabio Borini leh Sassuolo striker Domenico Berardi-te chu squad-ah koh tel an ni tawh lo a, hliam vangin Claudio Marchisio leh Marco Verratti te an inlan thei dawn lo thung.