Torres-a'n Champions League final a nghakhlel

Inrinni zan dar 12:15 hian Europe a club football inlena lian ber Champions League final chu San Siro-ah khelh a ni tawh dawn a, Atletico Madrid striker Fernando Torres chuan Real Madrid nena an inkhel tur chu a nghakhlel tawh takzet tih a sawi.

Torres hi 2010 World Cup bakah 2008 leh 2012 European Championship-a Spain champion team-ah khan a lo tel tawh a, Chelsea chu a vawi khat nan Champions League-ah a champion pui tawh bawk. Mahse, Liverpool striker hui hi Euro 2016 khel tura koh zingah a tel lo thung.

Kum 32-a upa Torres chuan champion a chak thu sawiin, "Atletico Madrid kawr ha chung ngeia Champions League nomawi chawi aia hlu leh ropui hi ka tan chuan a awm chuang lo ang. Chelsea an champion ṭum kha chuan a ti kimtu ve mai ka ni a, kha hun kha chu theihnghilh ka duh. Tunah chuan hmalam panin ka kal leh tawh a, ka ina awm ka nih avang hian inrintawkna pawh ka nei sang," tiin a club hmangaih chu nomawi chawipui a chak tawh hle.

Torres chuan an khingpui tur chungchang sawi chhun-zawmin,"Real Madrid-ah hian khawvela player ṭha ber ber an awm fur a, a bik takin tlarhmaah an hriam hle. Mahse, keini lam chuan hnehna chang turin inrintawkna kan nei a, player tin mai hian mahni tan ai chuan ṭhiante tana
ṭangkai nih kan tum vek. Hetianga induhsak tawnna ṭha hi tun hmain ka la hre ngai lo," tiin an inlungrual thu a sawi lang tel bawk.

Liverpool, Chelsea leh AC Milan-ah te hun a hman hnuah Torres hi nikum khan loan-in Atletico-ah a kir leh a, match 49 a khelh aṭangin goal 14 a khung leh tawh.

Kum 2014 khan team pahnihte hi Champions League final-ah tho an lo intawng tawh a, Real Madrid an champion. Tun ṭumah erawh La Liga-a pathumna Atletico hian an tihsual aṭanga inzirin hnehna chan let ve ngei an tum ang.