Celtic enkawl hi tlak hniamna a ni lo - Rodgers

Liverpool manager hlui Brendan Rodgers chuan Scottish Premier League club Celtic a enkawl tur chu English Premier League aṭanga tlak hniamna a nih loh thu a sawi.

Celtic Park-a thla 12 cham tura contract ziaktu manager chuan, "Celtic hi khawvela club lian ber pawl a ni a, he club enkawl tura Premier League aṭanga lokal hi tlak hniamnaah ka ngai lo," a ti.

Liverpool manager hlui chuan sawi chhunzawmin, "Celtic hi ka club ṭan em em ṭhin a ni a, he club ropui tak enkawl thei tura hun ṭha pek ka ni hi ka lawm a ni," tiin Scottish club lian a enkawl tur chu a inchhuan thu a sawi.

Kum 43-a upa manager chuan an hmachhawp sawiin, "Kei leh ka staff, ka player-te nen Scotland-a rorel chhunzawm zel turin theihtawp kan chhuah ang a, Champions League khelh ngei kan tum ang. Tun hnaiah inkhel entu an tam tawk loh avangin Celtic Park-a fans 60,000 chuang koh khawm leh ka tum a, heng fan-te hi football hmuhnawm leh result ṭha tak hmanga koh let kan tum dawn a ni," tiin a sawi.

Rodgers-a'n football hmuh-nawm hmanga fans kohkhawm a tum thu a sawi a, mah se khelmual chhungah pawh a team a kaihhruai hma hauhin Irish manager lawm tur hian Celtic Park-ah fans 10,000 chuang an pungkhawm a ni.

Irish manager hian transfer bazar-ah a player duhzawng lei turin Celtic neitu Dermot Desmond leh chief executive Peter Lawwell-te thlawpna ṭha tak hmu mah se a ngaih pawi-mawh ber chu player naupang zawk chher chhuah a nih thu a sawi tel bawk.

Nikum October-a Liverpool-in an ban tak Rodgers hian club enkawl a neih hma chu kum hnih chhung kum tin pound maktaduai 5 Reds aṭangin dawng dawn mah se thawk loa hlawh lak aiin khelmual lama kir a thlang ta zawk a ni.