Grassroots Football chungchangah MFA leh Mizoram SSA ten MoU an ziak

Mizoram chhunga football-in awmze nei zawka hma a sawn zel theih nan nimin khan Mizoram Football Association leh Mizoram SSA Mission ten School Education Hall, Mc Donald Hill-ah thawhhona thuthlung an ziak.

Mizoram FA aiawhin presi-dent Lal Thanzara leh Mizoram SSA aiawhin state project director Lalhmachhuana te chuan Memorandum of Understanding hi an ziak a, hriatpui turin H. Rohluna (education minister), Joseph Lalhimpuia (parliamentary secretary, education), V. Lalsiamthara (additional state project director, SSA) leh Vanlalmawia (joint secy, MFA) ten hming an ziah hnan bawk.

Inremna chu

MFA leh SSA te thawhhona hi grassroots football tih hmasawnna leh chawi lar a ni ber a, an inrem hun chhung hi kum thum chhung atan a ni.

• SSA-in football kaihhnawih chungchanga committee an huaihawt apiangin State FA aiawh an tel ve zel ang.

• SSA hnuaia district hrang hrang academy-te tan MFA chuan inelna a buatsaih ang.

• SSA hnuaia trainer-te'n AIFF D Licence an neih theih nan MFA-in hma a la ang.

• Hmeichhe football hma-sawn-na kawngah SSA-in MFA a pui ang a, academy zawng zawngah hmeichhe naupang panga tal neih a tum ang.

• Mizoram football-a kum dik lo hluar zel tihbo nan hma an la ang.

Mizoram tan NEIDA

TATA TRUSTS hnuaia mi North East Initiative Development Agency (NEIDA) chuan Mizo-ram hmasawn nan nasa takin hma a la a, MFA leh SSA in-remna hriatpuitu an ni.

Education Department, Mizoram leh TATA TRUSTS ten October 10, 2013 khan Aijal Club-ah inremna an lo ziak tawh a. NEIDA hian uluk taka SSA a zirchian hnuah thawhdun a rem ti a, nikum December thla khan football grassroots education puala SSA budget vaibelchhe 2.73 zet chu an pawm sak.

Hemi chungchang hi sawi-in state project director Hma-chhuana chuan, "Mizo-ramin hma a sawn theihna tur kawng chi hrang hrang panga chu TATA TRUSTS hnenah kan thlen a, Grassroots Football hi kawng khat chauh a ni a, hemi atan hian vaibelchhe 2.73 min pawmpui. Tunah hian nuai 51.84 kan dawng tawh a, duh anga hma kan lak chak theih loh avangin kan dawn tur ang hi pek kan la ni lo. Bul ṭan chhung hian hun a duh rei a, kan han ṭan chhoh takah chuan chak takin a kal thei tawh ang," tiin a sawi.

SSA state project director hian MFA nena thawh dun chu football tan chauh ni loin zirna nena a inrem thu a sawi tel bawk.

Tun dinhmunah SSA hian district parukah academy 60 an din a, naupang 3000 neih theih tura beisei a ni. Pilot project chauh a nih avangin Lawngtlai leh Saiha-ah academy hi hawn a la ni lo a, tuna an kalpui mek hi a hlawhtlin dan a zirin Mizoram district zawng zawngah neih theih beisei a ni.

MFA tan NEIDA

NEIDA hian football hma-sawn nan MFA nen an thawk dun bawk. NEIDA bul tumin Mizoram football thuneitu sang ber hian D Li-cence coaching course ṭum hnih an buatsaih tawh a, C Licence coaching course buatsaih a ni leh bawk ang.

Hei bakah hian NEIDA spon-sor-in Danny Lalduhawma chuan C Instructor course a zo tawh a, B Licence course chhim turin coach pali la tirh leh bawk tur a ni.

Nimin inremna erawh MFA leh SSA inkar chauh a ni a, hemi ṭum hian MFA joint secretary Vanlalmawia chaun Mizoram hlawhtlinna chu kalkhawmte bulah a sawi.

Aizawl FC an tel

Mizorama I League club hmasa ber Aizawl FC leh NEIDA an thawk dun tawh. MPL champion, NEIDA leh SSA ten thawhhona thuthlung an lo ziak tawh.

Nimin zing khan RG Sta-dium-ah India rama A Licence coach hmasa ber Jahar Das-a hnuaiah SSA hnuaia Academy trainer ten Grassroots Football Trainers Training an nei a, trainer 60 aṭangin 59 in he hun hi an chhim.

SSA-in grassroots an buai-pui a, Aizawl FC hian Mizo naupangte professional footballer ni turin kawng an zawn pui thung dawn a ni.