A chiang ta - Van Gaal an ban!
Manchester United-in tun sea-son-ah football hmuhnawm an khel lo a, kum 12 hnuah FA Cup nomawi chawi mah se manager Louis van Gaal chu Thawhṭanni khan ban a ni.
Dutch manager rual hian a assistant coach-te Max Reckers (performance analyst), Frans Hoek (chief goalkeeping coach) leh Albert Stuivenberg (assistant coach) te chu an chhuak nghal a, assistant manager leh club legend Ryan Giggs chu cham zel tura sawm a ni.
United executive vice chairman Ed Woodward chuan, "Louis leh a hnuaia thawkte kum hnih chhunga an hnathawhah kan lawm a, FA Cup-ah a vawi 12 nan min champion pui a, record dinglai kan nih rual thei hi kan chhuang a ni. Kan bula hun a hman chhungin puitling takin a khawsa a, naupang ṭhahnem tak inrintawkna nei turin a khelhtir bawk. A hmalam hun atan club chuan duhsakna a hlan a ni," tiin Dutch manager a thlah.
Ajax, Barcelona leh Bayern Mu-nich coach hlui Van Gaal thlakna tur hi official-in puan zar a la ni lo a, tunkar chhung hian Chelsea leh Real Manager hlui Jose Mourinho chu nemngheh a ni ang.
United lamtluang
2014 FIFA World Cup-ah Van Gaal-a'n rinkai ni pha lo Netherlands chu pathumna a nih pui hnuin United a zawm.
2014-15 season-ah Van Gaal hian pound maktaduai 150 bawr vel hmangin Red Devils hi league-ah palina a nihpui a, kum khat chhung European competition-a an tel loh hnuin Champions League khel turin an let. FA Cup-ah champion zui ta Arsenal chu 6th round-ah an hneh lo a, League Cup-ah Milton Keynes Dons hneh loin an mualpho.
2015-16 season-ah pound maktaduai 100 bawr vel hmang leh mah se Champions League group stage-ah an tla nghal. Europa League khel lehin an hmelma Liverpool hneh loin Round of 16-ah an tla a, league lamah pangana an nih phak chauh avangin Champions League an khel pha lo. League Cup-ah Championship club Middlesbrough hneh loin an tla a, season tluanin United khelh dan sawisel a ni a, Van Gaal-a'n season hmang zo hramin FA Cup nomawi nen United-a a huntawp a hmang.
United hian season hman zawh takah goal 49 chiah an khung a, 1989-90 season hnua goal an khung tlem ber a ni. Khualmualah United-in record an nei ṭha lo a, season hnih chhung chu away-ah negative goal difference an nei a. Hei bakah hian match 11 chhung chu first half-a goal khung loh zawn te an nei a, hnung zawngin ball vawi 3,222 zet inpein hemi kawngah hian league-ah an sang ber. Manchester United club hotute hian hlawhtlinna bakah inkhel hmuhnawm an duh a, Van Gaal-a hnuaiah an duh ang an hmuh loh avangin an ban ta a ni.
Van Gaal a lawm
Dutch manager Van Gaal chuan, "Manchester United anga club ropui ka enkawl thei hi ka inchhuanna a ni a, hemi kawngah hian hun rei tak aṭanga ka châk tawh ka tihlawhtling a ni. Kum 25 chhung manager hna ka thawh chhungin he club anga ṭawiawmna min pe ṭha hi ka la tawng ngai lo. Sir Alex Ferguson leh Sir Bobby Charlton te'n United manager ka nih chhungin kei leh ka chhungte chungah ṭhat an chhuah a, a bik takin a chungah ka lawm hle a ni," tiin United a enkawl thei chu lawmawm a tih thu a sawi.
Kum 64-a upa Ajax manager hlui chuan, "Ka career-ah nomawi 20 ka chawi a, chung zingah chuan FA Cup hi ka chhuan ber zinga mi a ni. He nomawi hi United kal zelnaah kawng sialtu a nih ka beisei. Old Trafford-ah hian kum thum contract ka ziak a, ka hmang zo thei lo erawh pawi ka ti a ni," tiin a hun tawp hman dan erawh a duhthusam a nih loh thu a sawi.
Van Gaal hian United academy chhuak player 14 khelhna hun a pe a, chung zingah chuan FA Cup final-a chakna goal khungtu Jesse Lingard leh striker duhawm Marcus Rashford te an tel avangin hemi kawngah hian Dutch manager hi a hmingṭha hle.
Van Gaal-a'n ban dan
May 22, Pathianni zing 12:30 AM (IST) : Manchester United-in FA Cup an chawi.
May 22, 1:24 AM (IST) : BBC Sport chuan Van Gaal an ban tur thu leh Mourinho-a'n a thlak tur thu an ziak.
May 22, inkhelh ban : Van Gaal-a nupuiin BBC Sport a chhiar hnuah an ban tur thu Dutch manager a hrilh.
May 23, Thawhṭanni tlai 4:30 PM (IST) : BBC Sport-in Van Gaal an ban tur thu an tichiang.
May 24, Thawhlehni zing 1:00 AM (IST) : Man Utd-in Van Gaal an ban thu an nemnghet.