Mourinho leh Manchester United an inrem

Jose Mourinho leh Man-chester United te chuan mimal contract chungchangah inremna an nei tawh.

Mourinho agent Jorge Mendes leh United executive vice-chairman Ed Woodward te chu inremna ṭul dangte sawifel turin nimin lamah khan London-ah an inbia. Portuguese manager hian car siamtu lar Jaguar-ah contract a nei a, Manchester United hi Chevrolet nena thuthlung nei an ni bawk. Hei hi an la inrem lohna langsar zual a ni a, football club lar United leh manager ropui Mourinho ten sponsor-tu an ngah avangin contract ziah hmain chinfel tur a tam hle.

Club aiawh Woodward leh manager aiawh Mendes te telephone leh email hmanga an inbiak hnuin Mourinho contract leh hlawh turah inremna an nei mai a, buaina dangte hi chinfel theih a nih hnuah chauh Mourinho hi official-in Manchester United manager tura puan theih a ni ang.

Nimin khan a ni hnih na atan club leh manager aiawhte an inbe leh a, he thu inchhiar meuh chuan inremna tluan tling a awm thei tawh hial ang.

Manchester United hian FA Cup an champion hnuah kum 64-a upa Louis van Gaal chu Thawhṭanni khan an ban a, Dutch manager chunga an lungawi lohna chhan ber nia lang chu football hmuhnawm an khelh loh vang niin a lang.

United keeper hlui Peter Schmeichel chuan Mourinho chu United chhanhim theitu tiin a sawi a, Hull City boss Steve Bruce chuan Premier League nomawi vawi thum chawi tawh manager lak theih laia an la lut hi United in an tihtur dik tak a nih thu a sawi ve bawk.

Chelsea manager hlui Carlo Ancelotti chuan United hian nikum lama an nihna an hloh tawh avangin Mourinho an la lut thei hi a fuh a tih thu a sawi.

Amaherawhchu United legend Eric Cantona chuan, "Mourinho chu mimal takin lawm mah ila, a khelh dan hmang hi United kalphung a ni lo. City manager ni ta Guardiola hi United tan a fuh zawk chu a ni," tiin defensive game khel ṭhin Portuguese manager chu a club hlui enkawl tura a duhthusam a nih loh thu a sawi thung.