Mizoram B'ball tana Sulsutu Mapuia

Mizo zinga India bas-ketball senior team tana khel hmasa ber H. Laldinsanga (Mapuia) chuan player a nihna anga sulhnu ropui tak a hnutchhiah hnuah Mizote tan basketball khawvelah kawng a sial leh ta. FIBA Coaching Certification Course Level 3 India ram aṭanga pass chuak thei hmasa berte zingah Mapuia hi a tel a ni.

Mizoram Super League season hnih khelh tawha Khatla TBL la champion pui ve ve tu Mapuia hian International Basketball Federation (FIBA) leh Basketball Federation of India (BFI) ṭangkawp ten an buatsaih Coaching Certification Course - Level 3 chu a zo a ni.

Bangalore-ah May 12-19 khan mi 10-in FIBA Coaching Certification Course exam an nei a, North East aṭangin Mapuia chiah hi a tel. FIBA Coaching Certification Course - Level 3 hi India rama coaching certificate sang ber a ni a, national team enkawl theihna a ni.

Saron Veng tlangval Mapuia chuan, "Hetiang dinhmun ka thlen theih nana tha min thawhpui tute zawng zawng chungah lawmthu ka sawi a, a bik takin SYS kaltlanga hetiang dinhmun thleng thei ka nih avang hian lawmthu ka sawi a ni," tiin Vanglaini palai a hrilh.