United-ah Ryan Giggs a cham dawn em?

Kum 14 leka upa a nihin Ryan Giggs-a'n Manchester United a zawm a, tunah kum 42-a upa niin a hmalam hun a ngaihtuah mek.

Louis van Gaal-a'n United a zawm rualin Albert Stuivenberg (Assistant coach), Marcel Bout (Assistant coach/opposition scout), Frans Hoek (Goal-keeping coach), Jos van Dijk (Training physiologist) leh Max Reckers (Performance analyst) te amah pui turin a hruai lut.

English club hian Reckers, Hoek leh Stuivenberg te chu Dutch manager ruala an chhuah thu an puang tawh a, Bout leh Van Dijk te pawh United-ah an awm rei a rinawm loh.

United-in Jose Mourinho an lak dawn takah chuan Giggs-a tan David Moyes leh Van Gaal-a hnuaia a hna ngai chelh theih a nih hmel loh. Portuguese manager hian club tenau Uniao Leiria a enkawl ṭumin fitness coach Rui Faria a chhawr ṭan a, Mourinho leh Portuguese coach hi an inthlah leh tawh lo.

The Special One hian club chhung hrechiang hi coaching staff-a awm turin a duh ṭhin a, United pawhin cham turin Ryan Giggs an thlem tawh a, a hna tur atana an zawrh erawh an puangzar lo.

United-in David Moyes an ban khan manager lailawkah ruat mah se ṭum hnih an en kanna a ni a, Giggs aiah amah aia tawnhriat ngah zawk Van Gaal leh Mourinho te thlan an ni.

Dubai-a chawlh hmanga kal tur Giggs hian a hmalam hun atana thutlukna pawimawh a siam dawn. Mourinho hnuaiah Giggs hi thu lo zawkin a awm thei a, chutihrualin a thuneihna hi a hma ang tal a nih loh chuan khawthlang lam thuthar thehdarhtute chuan a pawm an ring lo.

United-ah hna dang chelh turin Academy enkawl tura a khelhpui ṭhin Nicky Butt an lakluh tawh avangin naupang lam enkawl hna chu a ruak lo a, reserve team erawh beisei theih a ni. Tuna Under-21 team enkawltu Warren Joyce hi Blackburn Rovers in a sawm a, kum 2008 aṭanga reserve team enkawl tawhtu hi a chhuak a nih chuan Giggs-a'n Joyce-a hmunruak hi a luah thei ang.

Kum 42-a upa tana thutlukna dang awm leh thei chu club dang zawm a ni. United legend Peter Schmeichel chuan, "Giggs hian United enkawl a duh chuan chhuak se, tawnhriat tam zawk a neih hnuah let leh rawh se. Chutihrualin club chhung hrechiangtu a nih avangin United tan chuan a cham hi a pawimawh a ni," tiin a sawi.

Giggs hian a duhthusam hna chelh thei lo mah se hnathawh turah erawh a buai lo. Welsh manager hi Everton manager Roberto Martinez-a hmun ruak kalsan thlak thei tur zingah Man City chhuahsan tur hlui Manuel Pellegrini leh Dutch manager Frank de Boer te nen sawi rik a ni.