Copa America semifinal luh tum Klinsmann

USA coach Jurgen Klinsmann chuan June 4, Inrinni aṭanga khelh ṭan tur Copa America Centenario-ah chuan a sang pali zingah tal tel an tum thu a sawi.

Kum 51-a upa German manager chuan, "Tuna kan tum ber chu semifinal inhlankai a ni a, a sang pali zinga tel hi kan tum hmasa phawt tur a ni," tiin champion a sawi ri duh lo.

Player a nih laia khawvel striker ṭha ber pawl Klinsman chuan sawi chhunzawmin, "1994 World Cup hnua USA-in tournament lian tham a thlen leh hmasak ber a ni a, player tan chuan mahni ram ngeia ṭha taka khelh hi a châkawm dawn a ni," a ti.

Kum 2006 FIFA World Cup-a Germany pathumna nihpuitu coach chuan sawi chhunzawmin, "Kan match khelh tur apiang hi final angin kan thlir dawn a, chu chu player leh coach tan pawh a phurawm dawn a ni," tiin nuam ti taka khelh an tum tur thu a sawi.

CONCACAF Gold Cup 2013-a USA champion puitu coach huan Euro Championship aia Copa America a dah san zawk thu sawi lang nghalin, "Copa America-ah chuan ram 16 chiah kan inel dawn a, Euro-ah chuan team 24 an inel dawn. Hetia ngaihtuah ringawt pawh hian Copa inelna hi a hautak zawk dawn tih a chiang a ni," a ti.

Copa America match hmasa berah inelna thlengtu USA leh Colombia chu an inhmachhawn dawn a ni.