FIFA-in sumin MFA ṭanpui dawn

FIFA leh AIFF-in state paruk thlan bik puala workshop-a buatsaih chu nimin khan Kenilworth Resort, Goa-ah neih ṭan a ni a, FIFA chuan state parukte chu ṭanpuina US dollar 35,000 (Rs. 23,58,210) ṭheuh a pe dawn tih a puang a, Mizoram tan chanchin lawmawm a ni.

Vawiin thleng awh tur work-shop-ah hian Central & South Asia FIFA development officer Dr. Shaji Prabhakaran, chuan FIFA-in state parukte pawisaa a puih tur thu hi sawiin, "Football hmasawnna turin pawisa kan pe dawn che u a, he pawisa katlang hian hmasawnna duhawm tak hmuh theih kan inbeisei a ni," a ti.

FIFA senior development manager (Asia) Mike Pfister chuan, "Thla ruk kal ta aṭanga kan hna ṭan hmasawnna hmuh hian kan lawm hle a, ṭha taka hna in thawh zel chuan kan ngaihthah lo ang che u," tiin State FA parukte chu hna an thawh ṭhat phawt chuan puih zel an inhuam tih a puang.

AIFF general secretary Ku-shal Das pawhin an workshop pawi-mawhna sawiin, "FIFA-in state parukte technical officer leh marketing officer a pe ṭheuh che u a, a ṭangkai thei ang bera inhman kan duhsak che u a ni. State parukte hian in hun ṭha neih hi hmasawn nan in hman chuan India-in a hlawkna a lo tel dawn a ni," tiin State FA thlan bikte pawimawhna a sawi.

FIFA hmunpui Zurich aṭanga lokal mithiamten zirtirna an pekna workshop-ah hian MFA aiawhin honorary secretary Lalnghinglova Hmar, marketing officer Mark Lalduhsaka leh technical officer Danny Lalduh-awma-te an tel.

MFA honorary secretary Lal-nghinglova Hmar chuan," Mizo-ramin FIFA leh AIFF duhsakna a dawng hi kan lawm takzet a, workshop-ah pawh MFA chanchin a ṭha zawnga an sawi chhuak ṭhin hi a lawmawm hle a ni," tiin a sawi.