French Open Djokovic-a'n beiseina nen bul a tan

World number 1 Novak Djokovic chuan tunhma lama a la hawlhtlin ngaih lohna hmun French Open chu beiseina nen a khel ṭan ve leh ta. Nilaini khan first round khelin Yen-Hsun Lu lakah hnehna a chang nghal a, champion hnem ber Rafael Nadal pawhin second round a inhlangkai ve bawk.

Paris-a inkhelah Djokovic hian Yen-Hsun Lu service hi
ṭum sarih ngawt a chhuhsak a, harsa lo tak 6-4, 6-1, 6-1 a hnehna changin second round-ah chuan ATP ranking-a 161-na Steve Darcis a hmachhawn leh ang.

Tun hnai kum li chhunga final vawi thum lut thei Djokovic chuan, "Set khatna kha chu ka dinhmun siamrem turin ka inzawng buai nasa ve hle a, mahse set hnuhnung pahnihah erawh duhthusama ṭhain ka khel thei. A tawp thlengin hetianga
ṭha hian ka khelh theih ka beisei," tiin a la champion ngai lohna hmuna hlawhtlin a tum hle.

French Open vawi kaw champion tawh Nadal pawhin a dan pangngaiin Paris-ah mi chungnung bik a nih zia a pholang leh a, darkar khat leh minute 20 chhung lekin Sam Groth chu 6-1, 6-1, 6-1 in a sawp. Nadal hian Roland Gaross-ah hian match 73 khel tawhin ṭum hnih chiah chak loh a la nei a, ani aia record nei ṭha an awm lo.

Inkhel dangah world num-ber 2 Andy Murray chuan fiahna hautak zet a paltlang. Britain number 1 hian Thawhṭanni khan a match hmasa ber khelin Radek Stepanek lakah set hmasa pahnih chu 3-6, 3-6 in a hloh nghal, set thumna chu 6-0 a la letin set linaah pawh 4-2 in hma a hruai leh. Mahse, eng (light) a ṭhat loh avangin an inkhel hi tihtawp lailawk a ni. Thawhlehni tlai khan khelh chhunzawm niin Murray hian 3-6, 3-6, 6-0, 6-3, 7-5 in hnehna a chang hram.

Serena nge nge

Hmeichhe lamah world num-ber 1 Serena Williams chuan court chhungah a la tar lo tih a pholang leh ta. Kum 34-a upa Serena hian first round-ah Magdalena Rybarikova chu minute 42 chhung lekin 6-2, 6-0 in a hneh.

American star Serena hi tun dinhmunah Grand Slam inelnaah vawi 21 a champion tawh a, French Open-ah hian a hlawhtling leh a nih chuan Grand Slam vawi 22 champion thei Steffi Graf record a nih rual thei dawn a ni.

Barakhaih

Kumina Grand Slam hmasa berah khan Angeli-que Kerber-i'n champion tura rinkai Serena Williams hnehin champion nomawi a chawi. Mahse, Ger-man nula hian beisei a phak lo chhunzawm nghal a, French Open-ah pawh first round-ah world number 58 Kiki Bertens lakah 6-2, 3-6, 6-3 in a chak lo leh nghal.

Kum 28-a upa Kerber hi Madrid leh Rome Open-ah pawh khan a match hmasa beraha tho a lo chak lo tawh a, kar hmasa khan a dar na vangin Nuremberg aṭangin a lo inhnukdawk tawh bawk.

World number 5 Victoria Azarenka hi a hliam a dam hnuah Serena khing phak tura ngaih ber a ni a, March thla khan Miami Open final-ah Serena hi a hneh nghe nghe. French Open-ah pawh hian player beiseiawm pawl ni mah se a match hmasa berah Karin Knapp a hmachhawn a, 6-3, 6-7 a set khat ve ve an lak hnuah set thumnnah a khup na vangin a buai a, 4-0 laia a hniam hnuah a khelh chhunzawm thei ta lo a ni.

Buaina chu

French Open hi ruah sur duhlaia khelh ṭhin a nih avangin inkhelh hun tih danglam a ngai fo a, tournament ṭanni Pathianni khan inkhel tur 32 zinga 10 zet chu darkar lia sawn tlai a ngai. Thawhṭanni pawh khan inkhel tur eng emaw zat chu ruah sur vangin darkar hnih chuangin tih khawtlai a ni leh bawk.

Australian Open leh Wim-ble-don te hian ruah a sur palh pawh a inkhel tibuai lo turin a chung khuhna an nei tawh a, U.S. Open khelhna pui ber Arthur Ashe stadium pawh kumin aṭangin a chung khuh tura tih a ni bawk.

French Open chief Guy Forget chuan kum 2020 aṭangin Court Philippe Chatrier khuh an tum ve thu sawiin, "Mipui lam chuan ruah sur vanga inkhelh hun sawn tlai a ngai fo hi a chinfel dan kawng ngaihtuah turin min ti ang tih kan chiang. Grand Slam pathum dang ten stadium chung an neih tir vek dawn bawk. Stadium cheiṭhat nan hian pound maktaduai 350 ruahman mek a ni a, kum 2018 khi chuan mipui ṭhutna 5,000 siam belh hman beisei a ni a, kum 2020-ah chuan a chung khuhna siam hman ngei beisei a ni bawk," tiin an ruahmanna a sawi.