Buaina pumpelh nan zu khap dawn

European Championship 2016-a England leh Wales intawn hunah inkhelhna hmun tur France rama khawpui pakhat Lens kawtthlerah darkar 24 chhung zu zawrh leh in khap a ni dawn. Khawtthlerah zu hi khap ni mah se bar leh restaurant-ah te chuan a in theih tho dawn a ni.

British ram pahnih hi Group B-ah awmin June 16, Ningani zan dar 6:30 khian Stade Bollaert-Delelis, Lens-ah an intawng dawn. Zu khap hun chhung hi France ram hun anga chhutin Ningani zing dar 6:00 aṭanga Zirtawpni zing dar 6:00 thleng a awh ang.

Inkhel enna tur ticket emaw fan zone ticket emaw nei lo chu Lens khawpui pan lo turin an hriattir a, British Police te chuan ticket nei lo chu Lille emaw khawpui dang emaw fan zone-ah inkhel en mai turin an ngen. Fan zone hi football fan-ten nuamsa taka big screen hmanga inkhel an en theihna a ni a, stadium ang thoa dawl zawh chin nei a nih avangin mipui leng tawk bak ticket siam a ni lo!

Lens-a zu khapna dan hi England leh Wales inkhelh ṭum chiahin hman a ni lo. Group stage a Albania v Switzerland leh Czech Republic v Turkey bakah round of 16 match khat a thlen turah te chuan khawtthlera zu khapna dan hi keng kawh tur a ni.

Euro 2016-ah hian team 24 awmin British ram pathum England, Wales leh Northern Ireland an tel dawn. June 10 leh July 10 inkara neih tur inelnaah hian British police te chuan United Kingdom aṭangin mipui 350,000 a-
ṭanga 500,000 an kal an ring. UK-a chengte tan hian diltu maktaduai 1.6 aṭangin mi 250,000 hnenah chauh ticket hi pekchhuah a ni a, France rama zin tur zingah stadium chhung lut lo tur an awm nual dawn tihna a ni.