Indian Premier League RCB final luhna kawng sialtu ABD

Indian Premier League Qualifier 1 chu Thawhlehni zan khan khelh a ni a, AB de Villiers chet ṭhat zanah Royal Challengers Bangalore chuan hmahruaitu nichunga qualifier khel Gujarat Lions chu wicket li a hnehin a vawi thum nan IPL final an lut ta!

M.Chinnaswamy Stadium, Bengaluru-a inkhelah Gujarat Lions an bat hmasa zawk a, run kua an siam tlin hmain player pathum an hloh tawh! Mahse, Dwayne Smith rawn din hnuah Lions dinhmun a duhawm chho a, West Indies batsman hian a team tan run 73 a siam.

Gujarat Lions batsman ten Shane Watson an ngam lo a, RCB fast bowler hian over li lek a vawmah run 29 chiah pein wicket li a la - Gujarat-in over 20-ah run 158 chiah tlinin mi sawm an hloh a, Bangalore tan target huphurhawm a ni lo.

Mahse, beisei angin RCB an bat bik lo. Chris Gayle chu run kua chiah siamin a out a, Virat Kohli-a'n hun pawimawhah run siam miah loin khelmual a chhuahsan a ngai bawk. Mualneitu team hian run 31 an tlin meuh chuan mi panga an hloh tawh a, an dinhmun a ṭha lo takzet. Mahse, Bangalore an mangang rei lo.

A hunah tak AB de Villiers chuan a theihna pho chhuakin ball 47-ah run 79 a vaw chhuak a, a tawp thleng damin a team tan hnehna ropui tak a hlawh chhuak. Bangalore hian beisei loh takin over 18.2-ah ABD chet ṭhat zar zoin an target an umpha a, player paruk chiah an hloh bawk.

Lions tan a tir lama batsman hlauhawm Gayle leh Kohli vawm chhuaktu Dhawal Kulkarni che
ṭha viau mah se ABD a awm miau avangin Mumbai tlangval chet ṭhat hian awmzia a nei thui lo. Kum 27-a upa bowler hian over li a vawmah run 14 chiah pein wicket li a la thei a ni.

RCB-in final an lut nghal a, Gujarat Lions erawhin nizana Sunrisers Hyderabad leh Kolkata Knight Riders inkhela chak zawk Qualifier 2-ah hmachhawn leh ang a, Qualifier 2-ah hian hnehna an chang a nih chuan final an lut ang.