NBA Playoff Warriors hliahkhuhtu Thunder

NBA Finals khel turin Oklahoma City Thunder dinhmun a ṭha ta! Nimin zing khan Chesapeake Energy Arena, Oklahoma City-ah NBA Western Conference Finals Game 4 khelh a ni a, Thunder chuan Golden State Warriors 118-94 a hnehin series-ah 3-1 in hma an hruai.

Champion lai Warriors tan NBA Finals khel turin inkhelh hmabak pathum la awmah an chak vek a ngai tawh a, vawi khat pawh an chesual zeuh a nih chuan Thunder an tlang chiang nghal. Zirtawpni zing dar 6:30-ah Game 6 khel leh tur a ni ang.

Thunder tan Russell Westbrook chuan triple-double neiin a langsar fal hle. American point guard hian point 36 a score bakah assists leh rebounds vawi 11 ve ve a la bawk.

Kum 27-a upa Westbrook hian regular season-ah chuan triple-double hi vawi 18 zet lo nei tawh mah se playoff bikah chuan a vawi khat neihna a ni thung. Westbrook bakah hian forward Kevin Durant-a'n shoot vawi 24 a neih aṭangin point 26 a score bawk.

Thunder hian inkhelh bul ṭan aṭanga a tawp thlengin thapui an hmang char char a tih theih. Quarter hmasa berah 30-26 in hma an hruai fal nghal a, second quarter tawp lamah phei chuan point 20 zetin an chungnung zawk a, inkhel a tawp meuh chuan point 24 zetin an sang fal zawk.

Golden State tan Klay Thompson-a'n point 26 neiin a thawhhlawk ber a, MVP Stephen Curry kut kal ṭha lai a chawlh rih miau avangin American point guard hian point 19 bak a tlin zo lo a ni.

Warriors hian regular season khelh zawh takah khan match 73 hnehna changin season khat chhunga chak hnem ber record thar an siam a, mahse playoff-ah beisei an phak rih lo. Tun ṭum hi playoff bikah Warriors hi a zawna vawi hnih an chak lohna hmasa ber a ni nghe nghe. Chesapeake Energy Arena-ah hian match hnih chhunga an hniam zawkna belhkhawm chu point 52 zet a ni hial.