AFC Cup Mohun Bagan an tla; kalphung mumal lo an tuar?

Thawhlehni zan khan Mohun Bagan chuan AFC Cup last 16-ah an mikhual Tampines Rovers chu 2-1 in an hneh lo a, AFC Cup-ah beisei tur an nei tawh lo.

Indira Gandhi Athletic Stadium, Guwahati-a inkhelah mikhual team tana Jordan Webb (63') goal hmahruai chu Bagan tan Bikramjit Singh (72')-a'n a sut a, extra time khelh a nih hnuah Afiq Yunos (117)-a'n Tampines Rovers tan goal a khung ve leh avangin Kolkata club hi a tlawm zawkah an ṭang.

Bagan tan Mizo tlangval Jeje Lalpekhlua'n a dan pangngaiin inkhel bul a ṭan a, minute 10-naa Hnahthial tlangval ball tauh hi Tampine defender Ismadi bin Mukhtar chuan goalline aṭanga a lo pet chhuah hman avangin Jeje hian AFC Cup-a goal ruk khung chunga Asian club-te inelna sang ber dawttu hi tun season atan a mangṭha a ngaih phah.

Player inhliam

Mohun Bagan-in AFC Cup-ah hian hliam vangin captain Katsumi Yusa leh right back Pritam Kotal an chhawr thei lo a, Copa America khel tur winger Sony Norde an chhawr thei lo bawk.

Bagan striker Cornell Glen chu minute 38-naah hliam vang bawkin lakchhuah a ni a, Kolkata club tan an tlarhma pali rinrawl zinga khelmual luahlum awmchhun chu Jeje chiah a nih vangin Liverpool winger hlui Jermaine Pennant kawltu Singapore club-in hnehna an chang hi a mak lo.

Bagan zinkawng

AFC Cup hi Asian football-a club inelna sang ber dawttu a ni a, a chung chiahah Asian Champions League a awm. Chumi awmzia chu Mohun Bagan inlanna AFC Cup hi Europe-a Champions League khel pha lo club-te inelna Europa League nen a san dan a in ang tihna a ni.

India ram aṭangin I League champion-in AFC Champions League preliminary round 1 an khel ṭhin a, preliminary round 1-ah an chak a nih chuan round-2 leh playoff round paltlang tur a la awm leh a, playoff an paltlang zawhah group stage-ah an inhlangkai chauh.

I League champion bakah Federation Cup champion-in AFC Cup an khel ṭhin bawk a, kuminah hian Bengaluru chu Fed Cup champion nih vanga inlan niin nizan khan last 16 an khel a, result kan hre hman lo.

Nikum I league champion Bagan hian preliminary round 1-ah Thawhlehni zana an hneh loh tak Tampine Rovers hi 3-1 in an lo sawp tawh a, round 2-ah erawh Chinese Super League club ṭha Shandong Luneng chu 6-0 in an ngam lo thung.

Kolkata club hi Champions League-ah an inhlankai zawh loh avangin AFC Cup lamah an tla thla a, group stage-ah an tlin chian tawh hnua South China an hneh lo tih loh chu hneh loh tawng lo chungin last 16 an lut a, Indian club-in fak an hlawh.

Awmze nei lo?

Bagan-in season ṭha tak hmang mah se an tan AFC Cup khelh zel hian awmzia a nei thui lo a, last 16 match pawimawha an player ṭha an inhliam ṭhup hian zawhna tam tak a siam nghal - India club hian last 16 luh hi an tum lo em ni? tih chu zawhna piang nghal a ni.

I League khelh zawh a ni tawh a, Federation Cup cham-pion a chian tawh bawk avangin Indian football season pangngai a zo tawh. India ram buaina langsar chu league pahnih a awm hi a ni. Fed Cup khelh zawh a nih rualin Indian Super League atan club te an inbuatsaih lehnghal a ṭul a, player ngai thoin ISL an khelh avangin AFC Cup a nghawng lo thei lo.

Mohun Bagan hian last 16-ah khan Tampine Rovers hi lo hneh ta pawh nise quarterfinal-ah khawi player nge an chhawr ang? tih hi zawhna awm nghal a ni - player ṭhaten ISL an khel vek dawn miau a!

Last 16 hi paltlang ta se, players ṭha an chhuah vek dawn bawk si avangin Indian club tan an reserve player-te an chhawr a ngai dawn a, reserve player nen an thleng sang dawn lo tih chu thil chiang sa a nih avangin club-in AFC Cup hi sum khawhralna satliahah an ngai lo thei lo.

Sum sen ralna

Mohun Bagan senior official Srinjoy Basu chuan Calcutta Football League leh AFC Cup khelh chu a lo thlawna sum sen ralna mai nia a hriat thu a sawi a, Federation Cup champion hi season tharah chuan an inngaihtuah viau tawh tur thu a sawi!

Srinjoy chuan, "Calcutta Foot-ball League (CFL) tan vaibelchhe thum vel insen a ngai a, AFC Cup match hnih vel lek khel turin heti zat hi insen a ngai bawk. Guwahati-a AFC Cup match kan khelh apiangin sum tam tak khawhral a ngai ziah a, nakinah chuan AFC Cup kan khelh dawn leh dawn loh hi uluk takin kan ngaihtuah ang," a ti.

Mohun Bagan hian Calcutta Football League leh AFC Cup a khaikhin a, tournament pahnih khelh hian club tan hlawkna a ken tel loh avangin awmzia a awm lo a tihna a ni.

Hlawk lo maw?

Season hmasa AFC Cup champion Johor Darul Ta'zim khan dollar 350,000 an dawng a, kuminah erawh Asian Football Confederation chuan lawmman zat hi tipungin champion team hian dollar maktaduai khat an dawng.

Pahnihna (dollar 500,000), semifinalist (dollar 40,000 )-te pek an ni bawk a, Mohun Bagan hian last 16 an luh manah dollar 15,000 dawngin hei hi India pawisa chuan Rs. 10,10,775 niin Bagan player Sony Norde thla khat hlawh zatve pawh a phak lo!

Club hlawkna hi prize money-a teh chi ni lo mah se a tlem leh lutuk chuan club tan phur a har a, kum khat leh a chanve chhung sponsor-tu mumal pawh nei tawh lo

Kolkata club lian tan final tal luh loh chuan AFC Cup-in an sum bawm a pui pha lo a, ISL nen an in nang chin bawk si avangin Indian club-in AFC Cup hi an ngai thutak lo a nih pawhin a awm lo hran lo.