Zidane-a'n Guardiola hnung a zui thei ang em?
Real Madrid-in UEFA Cham-pions League final-a Atletico Madrid an hneh a nih chuan Zinedine Zidane-a'n club enkawl kawngah Jose Villalonga, Miguel Munoz, Tony Barton, Guus Hiddink, Joe Fagan, Vicente del Bosque leh Josep Guardiola te hnung a zui a ang. Heng coach pasarihte hian football club an enkawl kum khatnaah Europe club-te inelna sang ber nomawi an chawi nghal.
Kumin UCL final hi San Siro-ah Inrinni zan dar 12:15 hian khelh a ni dawn a, final-a vanduai tawh Diego Simeone leh manager nih hnua final vawi khat thlenna Zindane te intawng tur hi a hmuhnawm ang. France football legend Zidane hian January thla khan Rafael Benitez thlakin Real Madrid a enkawl ṭan a, thla li hnuah nomawi a chawi nghal a nih chuan footballer ropui hian manager ropui nih a hlat lo ang.
Coach pasarihte chu
1956: Jose Villalonga
(Real Madrid)
1954-55 season lai hawlah 'Pepe' Villalonga hian Real Madrid hi a zawm a, Spanish League-ah a champion pui nghal. Season puitling a enkawl hmasak berah European Cup nomawi chawi nghalin Real Madrid-in Europe inelna sang bera nomawi an chawi hmasak ber a ni a, kum 36 leh ni 184 leka upa niin tun thlengin nomawi chawi thei naupang ber a ni. Villalonga hian Real Madrid-a season hnih leh a chanve a cham chhungin European Cup, Spanish Champions leh Copa Latina-ah vawi hnih ṭheuh a champion pui.
1960: Miguel Munoz
(Real Madrid)
Villalonga hnuaia captain Miguel Munoz hian player anih laia 1956 leh 1957-ah a champion hnuin 1959-60 season semifinal aṭanga enkawlin a champion pui nghal. Zidane ang thoin club reserve team enkawl chhunzawmin 1960-1974 inkar khan Real senior team enkawl tir leh a ni a, European Cup vawi khat dang a champion pui leh bakah La Liga-ah vawi kua zet a champion pui a, Copa del Rey nomawi pahnih leh Intercontinental Cup nomawi a chawi pui bawk.
1982: Tony Barton
(Aston Villa)
Fulham, Nottingham Forest leh Portsmouth winger hlui Tony Barton chu Aston Villa manager Ron Saunders coaching staff zingah a tel a, February 1982-a manager Saunders-a'n banna a thehluh hnuah Barton hi team enkawltu a ni. English manager hian Villa hi European Cup champion pui nghalin European Super Cup a champion pui leh a, record ṭha a nei zui lo.
1984: Joe Fagan (Liverpool)
Fagan-a'n kum 1983-a Euro-pean Cup-a Liverpool vawi thum champion pui thei manager Bob Paisley a thlak hian kum 62-a upa a ni tawh. Football leh Liverpool-ah mi thar a ni tawh lo a, coach ropui Bill Shankly-a'n Reds a zawm hma kum 1958-ah English club resereve team hi a enkawl
ṭan tawh. Senior team a enkawl hmasak ber ṭum hian European Cup bakah First Division leh League Cup a champion pui. Season hnihnaah league-ah leh European Cup-ah pahnihna ve ve a ni a, a kum a upat tawh avangin manager hna a bansan a, Kenny Dalglish-a'n a rawn thlak.
1988: Guus Hiddink
(PSV Eindhoven)
Guus Hiddink hian PSV Ein-dho-ven-ah manager Hans Kraay a pui a, amaherawhchu club hotute nena intihthiam loh vangin Kraay hi a bang. February 1987 aṭangin Hiddink hian PSV hi a enkawl ṭan a, European Cup a champion pui nghal. Dutch manager hlawhtling Hiddink hian European Cup nomawi enkawl ṭan aṭanga kum 28 hnuah pawh Chelsea enkawlin Champions League a la khelhpui. Season tharah chuan kum 69-a upa manager hian London club-ah hian consultant hna a chelh ang.
2000: Vicente del Bosque
(Real Madrid)
Spanish manager hlawhtling Del Bosque hi manager a nih hnua Champions League nomawi a chawi hian Barton leh Fagan te ang thoin coaching lamah hian tawnhriat a nei fe tawh. Real Madrid enkawl lai lawk turin kum 1994 leh 1996-ah te ruat a ni tawh a, November 1999 khan manager John Toshack thlakin manager hna nghet a chelh. Del Bosque kaihhruaina hnuaiah Real Madrid an champion nghal a, 2001-02 season khan Zidane-a goal ropui hmangin UCL nomawi hi a chawi leh bawk.
2009: Josep Guardiola (Barcelona)
European Cup 1992 an champion ṭuma Barcelona player pawimawh Pep Guardiola-a'n 2006-a football khelh a chawlhsan hnuin Barcelona B-team a enkawl nghal. Thla 11 hnuah Catalan club enkawl nghalin Frank Rijkaard a thlak a, Dani Alves leh Gerard Pique te la lutin reserve team aṭangin Sergio Busquets leh Pedro Rodriguez te hruai chho nghal bawk. Season thara Manchester City enkawl tur hian Barca a enkawl hmasak ber ṭumin UEFA Champions League nomawi chawi nghalin final-ah Manchester United chu Rome-ah 2-0 in an hneh. Spanish manager chanchin hi sawi zau a ngai lo a, a hlawhtlin em avangin khawvelin an hria a, an la hre chho zelin a rinawm bawk.