Zaninah England Vs Australia Daniel Sturridge a inhliam leh tawh!

Stadium of Light-ah zanin dar 12:15 hian England-in Aus-tralia an mikhual dawn. Friendly match ni mah se European Championship khel tur final squad thehluh hmaa match hnuhnung ber tur a nih avangin Three Lions leh Socceroos inkhel tur hian ngaihven a hlawh hle.

Pa Vanduai Sturridge

Liverpool striker Daniel Sturridge hi English striker talent nei ṭha huangah dah hmaih a thiang lo a, amah-erawhchu inhliam vangin club leh ram tan a nih tur ang a ni phak loah a ngaih theih.

Tunah hian Manchester City training-na hmunpui City Football Academy -ah England team an inkulh mek a, kum 26-a upa Sturridge hian inhliam vangin Nilaini khan training a zawm lo.

England manager Roy Hodgson hian hman a ṭul a nih phawt chuan zanin inkhel turah pawh hian Reds striker hi hman theih a nih tur thu sawi bawk mah se France rama zin turin Sturridge hmalam hun a chiang lo.

Nilaini training-naah hian nupui neih vangin Jamie Vardy pawh a inlan lo a, Harry Kane hahdamna hun pek a nih dawn bawk avang leh captain Wayne Rooney midfield lama a tawlh hnun hmel bawk avangin thla thum liam taa United first team tana khel ve chauh Rashford chu starting eleven chang tura rinkai a ni.

Sturridge hian season li chhungin inhliam vangin Reds tan league-a match 15 khelh tlin season khat chiah la nei mah se Hodgson-a rilru tibuaitu tur chu English striker hi tun season Liverpool top scorer a ni. Ram tana vawi 17 khel tawh Sturridge hian league-ah vawi 14 inlan chungin goal riat a khung a, inelna dang nen chuan match 25 khelin goal 13 a khung.

Pa vannei Rashford

Sturridge ang bawka talent nei ṭha Marcus Rashford danglamna erawh vanneihna a keng tel hi a ni. English striker-in Manchester United tana khelhna hun a chan chhan kha a thiam vang chu ni bawk mah se a vanneih vang a ni a, loh theih loin Louis van Gaal-a'n a chhawr a ṭul.

Amaherawhchu kum 18-a upa Rashford hian United tan match 18 a khelhah goal riat a khung a, FA Cup final a khelh meuh chuan rinrawl a ni pha tawh. United ang thoa goal nen England tan bul a ṭan theih chuan Rashford hi France-ah hruai tel a ni ngei ang, chutihrualin tun bak hi hun ṭha a neih loh avangin European Championship khel turin kum li dang a la nghak ve thei bawk.

Paih hmabak 3!

England-in Euro 2016 inpuahchah nan friendly match hmasa berah Turkey chu 2-1 in an hneh a, midfield laiah Jack Wilshere, Jordan Henderson leh Danny Drinkwater ten beisei an phak lo.

Turkey hneh ṭum hian Ross Barkley, Andros Townsend, Fabian Delph leh Bertrand te chu khelhna hmun pek an ni lo. Tun ṭumah hian Europa League final khel Adam Lallana, James Milner leh Nathaniel Clyne ten England team an zawm tawh a, Roy Hodgson-a'n player khaikhin tur a la nei a nih chuan zanin hi a hman ṭangkai a ṭul dawn a ni.

Player 26 awmna England Squad

Goalkeepers: Tom Heaton (Burnley), Fraser Forster (Southampton), Joe Hart (Man City)

Defenders: Ryan Bertrand (Southampton), Gary Cahill (Chelsea), Nathaniel Clyne (Liverpool), Danny Rose (Tottenham), Chris Smalling (Man Utd), John Stones (Everton), Kyle Walker (Tottenham)

Midfielders: Dele Alli (Tottenham), Ross Barkley (Everton), Fabian Delph (Man City), Eric Dier (Tottenham), Danny Drinkwater (Leicester City), Jordan Henderson (Liverpool), Adam Lallana (Liverpool), James Milner (Liverpool), Raheem Sterling (Man City), Andros Townsend (Newcastle). Jack Wilshere (Arsenal)

Forwards: Harry Kane (Tottenham), Daniel Sturridge (Liverpool), Jamie Vardy (Leicester), Wayne Rooney (Man Utd), Marcus Rashford (Man Utd)

Note : Final Squad (Player 23) hi May 31, Thawhlehniah UEFA hnenah thehluh tur a ni.