French Open Harsa takin Murray chak hram zel

World number 2 Andy Murray-a'n a khelh ṭhat ber ni a la tawng thei rih lo a, Nilaini khan Ma-thias Bourgue chu set nga zet an inkhelh hnuah hneh hramin French Open second round a paltlang. Inkhel hi E-News (True Sports channel)-ah live a pekhchhuah a ni.

Roland Garros, Paris-a inkhelah Murray hian darkar thum leh minute 34 chhungin world number 164 Bourgue lakah hian 6-2, 2-6, 4-6, 6-2, 6-3 in hneh-na a chang hram. Seeded pahnihna Murray hian a match hmasa berah set nga bawk a khelh avangin inkhel pahnih a hmachhawn aṭangin court-ah darkar sarih chuang zet hun a hmang tawh.

French Open-ah hian kum 2005 khan seeded pahnihna Andy Roddick chu Jose Acasuso laka chak loin second round pawh a paltlang zo lo a, hemi hnuah Roland Garros-ah hian seeded pahnihna te chuan third round an la inhlangkai ziah.

Kum 29-a upa Murray chuan, "Mathias khan a khel ṭha hle a, min tlan tamtir tak zet bakah min chaih buai hneh hle a, hma hun êng tak a nei tih ka chiang. Ka insiam ṭhat thuai a ngai a, thleng sang tur chuan hetianga match khata hun rei tak tak hman hi a fuh lo," tiin player ṭha zawkte hmachhawn thei turin a tha khek a ngaih zia a hai lo.

Khawtual tlangval Mathias Bourgue hi kum 22 chauha upa a la ni a, tun ṭum hi Grand Slam tournament a vawi khat khelhna niin khawvela player ṭha ber pawl a chaih buai ve hle a ni.

Wawrinka chak zel

Champion lai Stan Waw-rinka pawhin a no-----mawi humhim turin hma-lam a pan ve zel a, Japan tlangval Taro Daniel lakah 7-6, 6-3, 6-4 a hnehna changin third round a inhlangkai ve bawk.

Kum 31-a upa Waw-rinka hian set hmasa ber-ah harsatna a tawk ve deuh a, Daniel-a'n set point vawi hnih a hmuh tawh chu a pawtthla leh hram a, set hnuhnung pahnihah erawh harsatna a tawk zui lo thung.

Inkhel dangah seeded pangana Kei Nishikori pawhin second round a paltlang ve a, Russia star Andrey Kuznetsov chu 6-3, 6-3, 6-3 in a lo hneh ve bawk.