Rafa Benitez: Bernabeu aṭangin Championship

Inrinni khian Rafael Benitez bantu Real Madrid chuan Cham-pions League final an khel dawn a, an manager ban tak Spanish manager erawhin Championship division lama club enkawl turin thutlukna a siam thung.

Newcastle United-in Premier League-a an match hnuhnung berah Tottenham Hotspur 5-1 in an sawp a, St James' Park-a fans pungkhawm ten Liverpool manager hlui hi an hnena cham chhunzawm turin inkhelh chhung zawngin a hming lam chungin an ngen a - an hlawhtling ta.

Kum 56-a upa Spanish manager hian March thla khan tlak hlauhawma ding Magpies hi a zawm a, match 10 a enkawlah vawi thum chiah tlawmpui mah se a hun neih a tep ter tawh avangin a chhanhim zo lo. Benitez hian St.James' Park a pan hmain a duh a nih chuan a contract tih tawp theihna dan a nei a, mah se Newcastle chhuahsan ai chuan kum thum cham tura contract thar ziah a thlang ta zawk a ni.

Cham chhan

Rafael Benitez-a'n football khawvelah tawnhriat a ngah tawh a, khawvela club langsar ber ber lo enkawl tawhtu manager-in Newcastle-a cham chhunzawm zel a thlang hian khawvel mak tih a hlawh a - eng nge a chhan? tih chu zawhna a ni.

UEFA Manager of the Year ṭum hnih lai lo ni tawh Benitez chuan, "Fan-ten min hmangaihna leh min duhsakna hi ka tan chuan St. James' Park-a cham chhan a tling a ni," tiin Newcastle fan-ten cham tura an ngenna chuan awmzia a neih thu a sawi.

Premier League Manager of the Month ṭum ruk lai ni thei coach hi Newcastle United chuan players leina tur sum tam tham tak pek an tiam a, Magpies-a football kaihhnawih thil hrim hrimah chuan ani aia thu an awm dawn lo!

Valencia, Inter Milan leh Napoli pawh lo kaihruai tawhtu coach chuan, "Magpies hi club ropui tak a ni a, Newcastle United hmabak ropui tak ka hmuh lawkah hian tel ve ka duh a ni. Ka tana pawimawh ber chu he club hian team ṭha leh chak tak kan din dawn tihah ka chian vang a ni," tiin squad ti chak turin sum an hman tur thu a sawi.

Magpies beiseina

Newcastle managing director Lee Charnley chuan 'world class' manager an kawl thei chu a lawm thu sawiin, "Manager atan Rafa kan neih tawh avangin Championship-ah season khat bak hun kan hman ka ring lo a, Premier League-ah kan kir lehnghal ka beisei tlat a ni," tiin Spanish manager lakah beiseina a nei sang hle.

Charnley chuan an fan-te fakin, "Rafa hian kan fan-te nen inzawmna ril tak an nei a, ani ang manager ropui kan hnena a cham chhanah hian fan-ten tha tam tak an thawh tih hai rual a ni lo," tiin fan-te vanga Benitez chelh thei an nih thu a pha lo.

Eng nge an sawi?

Newcastle legend Alan Shea-rer-a'n Magpies-a Benitez a cham chuan a tan thil mak a nih tur thu a sawi a, he 'thil mak' avang hian English striker ropui chawl ta hi a phur hle. Shearer chuan, "Newcastle tan ani ang coach ropui kan chelh thei hi chu thil mak a ni a, club-ah inthlak danglamna liantham tak a thleng a ni ber e," a ti.

Newcastle coach hlui Mark Lawrenson chuan, "Player-te nen inpawh tak si a thununna ngai pawimawh mi a ni a, players a hralhna mai bakah sum tam tak a dawng dawn - a duhnaah chuan khawngaihna nei tlem tak a ni. Spain-ah division hniam lam
aṭangin bul a ṭan tawh a, a buai lo ang. Fans nei ṭha tak Liverpool leh Valencia a enkawl tawh a, Newcastle-a cham a thlan chhan hi ka hrethiam a ni," tiin fan-te vanga chamah a ngai.

Benitez sulhnu

Player a nih laia Real Madrid B team tana khel ṭhin Benitez hian inkhelh a chawlhsan hnu-ah Real B team aṭang hian a coaching career a ṭan a, a hun hmasa lamah Spain second division club Extremadura leh Tenerife-te chu La Liga-ah a kaipui.

Kum 2001 khan Valencia enkawl ṭanin Spanish club hi kum thum a cham chhungin La Liga nomawi pahnih a chawipui bakah UEFA Cup-ah a champion pui a, Valencia a chhuahsan hnuah Liverpool panin English club-ah hian a hmingṭha hle.

Reds hi Premier League no-mawi chawipui lo mah se Champions League (1) FA Cup (1) leh UEFA Super Cup (1)-te a chawipui a, Anfield-ah season ruk hun a hman chhungin Champions League final vawi hnih a hruai thleng thei bawk.

Kum 2002 La Liga best coach hian Reds a chhuahsan hnuah Inter Milan panin Supercoppa Ita-liana leh FIFA Club World Cup-ah a champion pui a, Chel-sea chu Europa League-ah no-mawi chawipuiin Napoli-a enkawl hnuah Coppa Italia leh Supercoppa Italiana nomawi a chawipui bawk - Benitez-a sulhnu enin Championship-a khel tur Newcastle a cham a thlang hi Magpies fan-te tan chuan lawmna tham a ni.