Indian Premier League KKR beiseina a thamral; Yuvraj a la thiam reng

Nilaini zan khan Indian Premier League-ah Eliminator round khelh a ni a, Sunrisers Hyderabad chuan Qualifier 2-a Gujarat Lions hmachhawn turin Kolkata Knight Riders chu run 22-in an hneh.

Sunrisers Hyderabad tan Yuvraj Singh chuan a thiam a la theihnghilh lo tih a tarlang a, kum 34-a upa batsman hian ball 30 a hmachhawnah run 44 siamin Hyderabad batsman zingah run siam hnem ber a ni.

Feroz Shah Kotla, Delhi-a inkhelah hian bat hmasa zawk Hyderabad-in over 20-ah run 162 siamin mi pariat an hloh a, target chhuanawm a ni lo. KKR bowler zingah Kuldeep Yadav a khel
ṭha a, kum 21-a upa spin bowler hian over li a vawmah run 35 pein wicket thum a la.

Kolkata-in target tam nia lang lo an um a, SRH bowler-te hmaah KKR batsman-te an zawr. Kolkata Knight Riders hian over 20-ah run 140 chiah siamin mi pariat an hloh a, batsman zinga run siam hnem ber Manish Pandey chuan run 36 a tlin thei hram!

Hyderabad bowler zingah Bhuvnesh-war Kumar chuan over li a vawmah run 19 lek pein wicket thum a la a, over thum a vawma run 17 chiah pea wicket hnih latu Moises Henriques chuan a khel ṭha viau bawk.

Zanin dar 8:00-ah Sunrisers Hyde-rabad-in inkhel an hmachhawn lehnghal dawn a, Delhi khawpuiah Qualifier 1-a chak lo Gujarat Lions nen final-a Royal Challengers Bangalore hmachhawn tur an zawng ang.