Bengaluru-in AFC quarterfinal an thleng Chakna goal khungtu Daniel-a'n a pa tan a hlan

27th May, 2016

I League champion Bengaluru FC-in an club history-a a vawi khat nan AFC Cup-ah quarterfinal an thleng a, chakna goal khungtu hi Serchhip tlang-val Daniel Lalhlimpuia a ni.

Nilani zan khan Mong Kok Stadium, Hong Kong-ah Kit-chee SC-in Rufino hmangin minute 7-na lekah hma an hruai a, Bengaluru FC-in captain Su-nil Chhetri goal hnih (31', 33') hmangin an lehthal. Hong Kong club Jordi Tarres hmangin first half tawp hma hretin sut leh mah se minute 51-naah Mizo striker Daniel-a'n chakna goal a khung.

Bagan tel lohna

Tun season-a India ram club ṭha ber hriatthiam a har hle. Mohun Bagan-in coach Sanjoy Sen hrem an tuar a, I League-ah pahnihna ni mah se champion Bengaluru FC
ṭum hnih an hneh a, Federation Cup an champion bawk.

Bengaluru FC hi I League-ah an champion hramin lang mah se Mariners thlen phak lohna AFC Cup quarterfinal thleng thei an ni. India ram champion hian Mariners aiin player nei langsar lo zawk mah se an daih rei zawk.

Quarterfinal-ah hian East Zone aṭangin Bengaluru bakah Hong Kong club South China, Malaysia club Johor Darul Ta'zim FC leh Singapore club Tampines Rovers FC te an tel a. West Zone aṭangin Bahrain club Al-Muharraq SC, Iraq club Nadi Al-Quwa Al-Jawiya, Lebanon club Al-Ahed SC leh Syria club Al-Jaish SC te an tel bawk.

Quarterfinal first leg hi September 13-14 ah khelh tur a ni a, second leg hi September 20-21 ah khelh a ni thung ang. Tie draw-ah seeded siam ni dawn lo mah se West Zone leh East Zone erawh dah hran tur a ni.

ISL nena buaina

India ramin league pakhat a neih a ṭul chhan chu tun ang hun atan hian a ni. I League zawh a nih tawh hnuin September thla aṭangin Indian Super League
ṭan a ni dawn a, Bengaluru FC tan inpuah-chahna ṭha a awm thei dawn lo.

Bengaluru player-te'n AFC Cup chiah hmabak an neih tawh avangin chawlh an nei nghal dawn a, hma an lak zel dan tur chu an la ngaihtuah chawp a ngai thung ang.

Mizo player tiamin Benga-luru player-te hi ISL-ah club an nei dawn a, AFC Cup quarter-final an thlen takah chuan an contract tur pawh uluk zawka duan a ṭul dawn a ni.

A pa a hre reng

Bengaluru striker Daniel Lalhlimpuia chu May 11 khan a pa LH Zohmingliana'n a thihsan a, chutichung chuan AFC Cup-a Johor Darul Ta’zim nen Malaysia-a an inkhelh
ṭumin a hna a ṭhul lo.

Serchhip tlangval Daniel chuan, "AFC Cup-a ka goal khat khungna a ni a, Bengaluru FC-in quarterfinal vawi khat kan thlenna a ni bawk. He goal pawimawh tak hi ka pa tan ka hlan a ni," tiin a pa a hre reng.

AFC Cup chungchang sawiin Daniel chuan, "Chak tura rinkai lo zawk kan ni a, team pumpui thawhrimna zarah khualmualah hnehna kan chang thei kan lawm hle a ni," tiin Vanglaini palai a hrilh.