AC Milan captain nih châk Donnarumma

Goalkeeper Gianluigi Donna-rumm chuan engtik hunah emawh chuan AC Milan team captain nih a châk thu leh hun rei tak cham a duh thu a sawi.

Kum 17-a upa Donna-rumma hi a kum la tam lo mah se theihna a neih san em avangin nikum October thlaa Sassuolo 2-1 a an hneh ṭumin Milan tan a match hmasa ber a khel der tawh a, club lian ṭhenkhat chuan an hmu tai leh hle tawh nia sawi niin Italy leh Juventus icon Gianluigi Buffon ang maia player ropui tura ngaih a ni der tawh!

A beisei aia hmain Milan tan a khelh thu sawiin Donnarumma chuan, "Season ṭan dawn kha chuan ka la inkhelh phak hi ka ring lo, hun ṭha min siamsaktu coach Mihajlovic chungah ka lawm hle. Hmasawn tur chuan he team hian tuna inlungrualna kan neih hi ka vawn nun zel a pawimawh ang," tiin a sawi.

Serie A-ah Milan hian point 57 chiah an hmuh avangin league table-ah pasarihna an ni phak hram a, season tharah Europe-ah an inlan dawn lo.

A hmalam hun sawi chhun-zawmin, "Milan-ah hian hun rei tak chhung cham chhunzawm zel ka duh a, season tharah chuan a sang thei ang bera awm tura puih hi ka tum a ni. Nakinah chuan captain armband hren ve ngei hi ka duhthusam a ni," tiin a hmalam hun a sawi bawk.

Italy coach Antonio Conte chuan Euro khel turin Donnarumma hi a ko tel ve lo a, mahse rawlthar keeper hian Azzurri tana khelh ve a châk thu sawiin, "Ram tana khelh baka hlu hi a awm thei chuang lo ang, Italy kawr ha thei ngei turin ka theihtawp ka chhuah zel dawn," tiin an ram aiawha inkhelh ngei a tum hle.