Pato hmalam hun a chiang lo

January thlaa season tawp thleng loan-a khel tura Chelsea pantu Alexandre Pato agent Gilmar Veloz chuan a player hmalam hun chungchangah club-in inbiakna engmah an neihpui loh thu a sawi.

Pato hian Chelsea a pan hmain China aṭangin sum tam tham tak hlawh tura sawmtu nei mah se Stamford Bridge pan a thlang a, a ti fuh lutuk lo. Blues tan match hnih chiah khelin goal khat a khung a, a goal khung hi a match hmasa bera penalty aṭanga a khung a ni.

Gilmar Veloz chuan, "Chelsea hian Pato emaw, keimah emaw tumah biak an la nei lo a, an ngawi veng veng mai a ni," tiin London club-in hmalakna an neih loh thu a sawi.

Season thar aṭangin Antonio Conte-a'n Chel-sea a enkawl dawn a, Euro 2016-a Italy kaihruai tur coach hian striker hming langsar zingah Gonzalo Higuain, Romelu Lukaku leh Alvaro Morata-te zinga khawi emaw ber hi lakluh a duh thu club hotute a hrilh tawh niin khawthlang media-te chuan an tarlang.

Conte-a ruahmannaa a lan dan chuan Diego Costa hralh a rem lo a, Ra-damel Falcao chu Mona-co lamah kir tir tawh niin Loic Remy hma-lam hun a chiang lo a, Pato chungchang erawh eng-mah sawi a awm lo thung!

Pato agent chuan Conte hmalakna chunchang hi sawi langin, "Conte-a'n Stamford Bridge-a player-te a zir chiang mek tih kan hria a, Pato erawh biak a la ni lo. Ka player hmalam hun hi a la chiang lo a, Chelsea hian an duh chuan a nghetin an la lut thei. Blues hnen aṭanga chanchinthar engmah kan hre lo a nih chuan club dang kan zawn a ṭul ang," a ti.

AC Milan tan a khelh laia khawvela stri-ker beiseiawm ber pawl ni ṭhin Pato hian Con-rinthians lama kir leh ai chuan Premier League-a cham chhun-zawm zel a duh a, England-a a cham a nih chuan London club ngeia khelh a duh niin an sawi bawk.