AIFF Youth Cup champion S.Korea

Nilaini zan khan Maidan Stadium, Vasco-ah AIFF Youth Cup final khelh a ni a, South Korea chuan United States of America lakah 2-1 a hnehna changin champion hmasa ber an ni.

Goa-a inkhelah hian Korea tan Lee Hakseon chuan minute 14-naah goal hmahruai a khung a, US tan Andrew James chuan minute 31-naah sut ve lehin 1-1 in chawlhlawk an hmang. Second half-ah goal kan hmu zui lo a, extra time khelh niin Jeon Seungmin chuan minute 114-ah freekick aṭangin an chakna goal a khung.

2016 AIFF Youth Cup hi All India Football Federation-in a buatsaih niin tun ṭum hi a vawi khatna a ni a, May 15-25 chhung khan India bakah AIFF sawm bik ram Malaysia, Tanzania, South Korea leh USA ten an khel. He inelna hi 2016 AFC U-16 Championship leh 2017 FIFA U-17 World Cup khel tur India under-17 team tuaihriam nana siam a ni.

Inelna thlengtu India chuan beisei an phak lo hle a, Malaysia (2-2) leh South Korea (0-0) a an inhnehtawk pui laiin Tanzania (3-1) leh US (4-0) te an hneh lo thung a, point hnih hmuin a hnuai berah an awm.

Ram pangate hi league round-ah vawi khat ṭheuh an inkhel kual a, point hmu sang pahnih ten final khelin pathumna leh palina te chuan third place playoff an khel thung. League table-a pathumna Tanzania chuan Rashid Abdallah, Shabani Zuberi leh Muhsini Malima te goal khat ṭheuh khung hmangin Malaysia 3-0 in an hneh a, pathumna nichungin AIFF Youth Cup an khar.