Man United-ah Ronaldo a let dawn lo

Jose Mourinho-a'n Manchester United a zawm dawn tih an sawi rik rualin media lamin Cristiano Ronaldo chu 'The Special One' hnung zui turin a hming an lam ri tel nghal a. Tunah erawh Ronaldo hmalam hun a chiang tawh, amah berin Real Madrid-a cham zel a duhthu a sawi.

Real-ah a lungawi

Kum 31-a upa Ronaldo chuan, "Real Madrid aia club
ṭha ka hmu lo a, club dang nen buk tawn pawhin Real aia buk rit ka hmu lo. Tun dinhmunah chuan Real-ah ka hlim em em a, he club-ah hian cham zel ka duh a ni. Real Madrid hi khawvel club ṭha ber a nih avangin club dang chuan min theihngilh thei ang," tiin Spanish club tana a rinawm thu a sawi.

Manchester United aṭanga hming chher Ronaldo hian kum 2009 khan Real a zawm a, kum 2013 khan a contract neihlai chu kum 2018 thleng a pawtsei. Portugal captain chuan, "Real hian contract thar min zawrh chuan thutlukna
ṭha tak an siamah ka ngai ang," tiin thu chu a taka nemngheh a duhthu a sawi.

Ronaldo a dam

Inrinni zan dar 12:15 hian San Siro-ah Real Madrid leh Atletico Madrid te'n Champions League final an khel dawn a, Ronaldo a dam ṭha em? tih hi zawhna a ni.

Thawhlehni khan Real training-naah Ronaldo hi hliam tenau a tuar avangin midang aiin zo hma mah se a tukah erawh dan pangngaiin training a zawm leh tawh thung.

Portugal captain Ronaldo chuan, "Cristiano hi inkhel pawimawhah chuan a inlan zel ang. Final-ah chuan 100% in ka fit ang a, Lisbon-a kan intawn hmasak ṭum aiin ka dam ṭha zawk ang," tiin a sawi.

2014 Champions League final-ah Real leh Atletico hi hun pangngaiah 1-1 a an inhnehtawk hnuin extra time-ah Los Blancos-in goal thum an khung belh a, goal hnuhnung ber hi Ronaldo khung a ni.

Hun kal tawh sawi chhuakin Ronaldo chuan, "Lisbon-ah kha chuan ka malpuiah harsatna ka nei a, a nat em avangin ka ṭhat theih dan berin ka khel chhuak thei lo," tiin Manchester United leh Real Madrid-in Champions League nomawi an chawi ṭuma goal khungtu chuan a sawi.

Mourinho leh United

A pu leh club hlui chung-chang sawiin Ronaldo chuan, "A (Mourinho) ziak vek tawh a ni lawm ni? United-in uluk takin thutlukna an siam a, a ṭhat ka ring. Manchester United hian nikum khan an nihna an hloh a, ka club hmangaih an nih avangin dinhmun ṭha loa an awm hian ka rilru a na ṭhin. Mourinho hian tun hmaa an awmna ṭhinah a hruai kir leh theih ka beisei," tiin duhsakna a hlan.

Kum 2010 khan Mourinho hian Real Madrid a zawm a, Spanish club-ah kum thum a cham hnuin Portuguese manager hian Chelsea a zawm. Real manager hlui hian Chelsea a champion pui nghal nachungin season liam ta khan result ṭha a neih loh vangin London club hian an ban a, season tharah Man--chester United a enkawl ang.

Mourinho contract

Mourinho-a agent Jorge Mendes leh United executive vice-chairman Ed Woodward te an inbe chhunzawm zel a, vawiin lam hian contract ziah fel theih beisei a ni.

United-in Mourinho an la lakfel theih lohna chhan chu 'image rights' vang a ni. He buaina hian Portuguese manager-in Red Devils a zawm tur a tikhawtlai ringawt a, inbiakremna ṭhulh phahna tur a ni lo.

Chelsea hian kum 2005 daih tawh khan 'Jose Mourinho' leh a signature neitu nihna an lo nei tawh. London club hian an thil zawrhah an dun danin Portuguese manager hming hi an tarlang thei tihna a ni a, mahni hming ngei neitu nihna Mourinho-a'n a nei lo hi a mak ang reng hle.

United hian Chelsea hnen aṭanga neitu nihna an lei chhuak lo a nih chuan Jose Mourinho hming chuanna an zawrh apiangin London Club hian an khing thei dawn tihna a ni. Chuvangin Red Devils hian Mourinho contract hi an leichhuah mai a ṭul tihna a ni.

Buaina dang awm leh chu Mourinho hian Jaguar-ah contract a nei a, United thawm-hnaw sponsor-tu chu Chevrolet a ni thung. Amaherawhchu he buaina hi contract ziah kawnga harsatna siam tur em a lian chu a ni lo, United player kawllaiah pawh mimal contract leh club con-tract neihna inhal an awm nual.

Mourinho hian United a zawm thuai dawn a, Ronaldo erawhin a pu hlui hnung hi a zui dawn lo.