Lukaku-a'n Everton chhuahsan a duh

Tun hnaia chhuak tur anga sawi thawm awm reng Everton striker Romelu Luka-ku chuan nomawi chawi a duh thu sawiin, Merseyside club-ah chuan a beisei ang tih hlawhtlin a harsat a rin thu a sawi nghal a, Belgian striker chhuahna tur an inrinsiak nghal!

Lukaku hian Everton tan season thum chhungin goal 61 a khung tawh a, amah duhtu zingah Chelsea leh Manchester United chu thawm nei na niin Belgian striker pa chuan a fapa hi Bayern Munich-a kal tura a duh thu a lo sawi ve mek bawk.

February thla khan Iranian sumdawng hausa Farhad Moshiri chuan Everton hi leiin nipui bazar-ah sum tam tham tak theh chhuah a tum thu sawi mah se Lukaku-a rilru a thlak danglam phah lo niin a lang.

Kum 23-a upa Belgian striker chuan, "Ka hma hun atana ṭha tur ngaihtuah chunga thutlukna ka siam a hun tawh takzet. Everton-ah neitu thar kan nei a, sawi duh a neihte ka ngaihthlak sak ang. Mahse, ka career-ah hian enge ka duh ber tih ka chiang tawh a, nomawi chawi ka duh a ni," tiin season hman zawh taka League Cup leh FA Cup semifinal-a tlawm Everton-ah champion theih a inbeisei lo.

Kum 2014-a Everton chan-china player man to ber ni tura pound maktaduai 28-a a ngheta Goodison Park pantu striker chuan sawi chhunzawmin, "Season ṭha tak ka hmang zo chiah a, tunah chuan mahni hmakhua ka ngaihtuah a hun ve tawh. Chelsea aṭang khan nomawi chawi duhna thinlung ka nei a, no-mawi chawi hi ka football khelh chhan a ni," tiin a sawi.