Zidane hian min suihkhawm - Ramos

Real Madrid captain Sergio Ramos chuan an manager Zinedine Zidane chuan player leh coach inkar chu tun hma zawng aia ṭhain a rawn siam-
ṭhat thu a sawi.

January thla khan Rafael Benitez thlak turin Zidane hi Real coach atan lakluh a ni a, Galacticos hunlaia midfiel-der ropui hian La Liga-ah cham-pion pui zo lo mah se Champions League final a hruai thleng a, Inrinni zan hian Atletico Madrid nen San Siro-ah an inhmachhawn dawn.

France international hlui hian player a nih lai 2001 Champions League final khan Bayer Leverkusen lakah goal ropui khungin Real Madrid hi nomawi a lo chawi pui tawh a, Zidane hi khelmual chhunga a awm laia a player puite zah rawn a ni ṭhin a, manager a nih hnuah pawh a nauten an zah chhunzawm zel hi a mak hran lo.

Kum 2013 khan Carlo Ancelotti kaihhruaina hnuaiah Real Madrid hian Atletico 4-1 a hnehin a vawi 10 nan Champions League-ah an lo champion tawh nghe nghe.

Spain international Ramos chuan, "Zizou nen hian kan inkar boruak a ṭha hle a, player-te min kawm-ngeihin ṭhianah min siam a, he hian thawhhona a tih awlsam phah hle. Amah hi player a nih lai chuan mi zakzum tak mai a ni ṭhin a, mahse coach a nih hnuah chuan a danglam tawh," tiin an coach chung-chang a sawi.

Real hian Barcelona an tluk loh avangin La Liga no-mawi an chawi phak lo a, Champions League tal lak ngei an duh ang. Mahse, final-a an hmachhawn tur Atletico Madrid lakah hian an chak khat hle a, an intawn hnuhnung vawi 10-ah ṭum khat chiah hnehna an chang.