Griezmann dahsangtu Simeone

Atletico Madrid coach Diego Simeone chuan Antoine Griezmann chu tunlai khawvela forward ṭha berte zinga mi a ni thu a sawiin a nau duhlai chu a dahsang hle.

France international Griezmann hi tun season-a Atletico player pawi-mawh berte zinga mi a ni a, inelna hrang hrangah match 53 a khelh
aṭangin goal 32 a khung. Argentina manager Simeone chuan a player duhlai hi Lionel Messi leh Cristiano Ronaldo te huangah a dah hial.

Kum 25-a upa Griezmann hian Champions League semifinal-a Bayern Munich an hneh ṭumin goal pawimawh a khung a, February thla khan La Liga-ah Real Madrid an hnehna goal awmchhun a lo khung tawh bawk.

A player dunlai chungchang sawiin Simeone chuan, "Griezmann hian hmasawn zel a duh avangin a thawkrim em em a, hmabak insiam zelin chu chu hlenchhuah zel pawh a tum ṭhin. Tin, player hmasawn nana pawimawh ber pakhat coach thu leh hla a ngaithla ngun ṭhin em em a, tunah chuan khawvela player ṭha pathum zingah a tel," tiin Ronaldo leh Messi te nen ang khatah a ngai.

Real Madrid nen an inkhelh tur thlir zuiin, "Champions League final khelh hi chu club tin tan duhthusam a ni a, keini pawh hian kan nghakhlel hle. Mahse, boruak rit tak kan indelh tir duh lo a, engthawl leh nuamti takin kan inbuatsaih. Real hian tlarhma lamah khawvela player hlauhawm ber ber pawl an rawn tlar ngeiin a rinawm a, chumi lo dang tur chuan kan inpuahchah," tiin a sawi.

Real Madrid hian tlarhmaah Ronaldo bakah Gareth Bale, Karim Benzema leh Luka Modric te an nei a, Atletico hi tunlai Europe club zinga tlarhnung phui berte zinga mi an ni thung.