Set nga khelh hnuah Djokovic a chak

Ama tihsual avangikn set linaah service a hloh a, inkhel inhnehtawk takah Novak Djokovic chu a tlawm mai dawn ni pawhin a lang hman - mahse, a tawpah erawh ball ṭha bik hlap chhuak lehin Francisco Cerundolo a hneh.

French Open champion lai Djokovic chuan set nga an khelh hnuah Cerundolo chu 6-1, 5-7, 3-6, 7-5, 6-3 in a hneh, chak tur hian darkar li leh minute 39 chhung hun a hmang a ni.

Inkhel dangah Alexander Zverev pawhin quarterfinal a inhlangkai, German tlangval hian a khingpui Holger Rune chu 4-6, 6-1, 5-7, 7-6(2), 6-2 a hnehin last 16 a paltlang ve bawk.

Novak a chak

Djokovic tan season duhawm lo a nih thu kan sawi fo tawh a, tennis court chhungah pawh tun hma angin a la che thei rih lo. Grand Slam vawi 24 champion tawh hian ni thum chhungin match pahnihah set nga a khel, a chau hle ang tih a chiang.

Kumina nomawi la chawi lo Djokovic hian kum 15 chhunga Roland Garros aṭanga a tlak hma ber ṭum a tawng teuh hle, a tawpah erawh tawnhriat nei leh rilru huaisen a nihna lantirin a chak leh ta hram.

World number 1 Djokovic chuan, "Engtin nge hnehna ka chan theih pawh ka hrethiam bik lo, phur taka min lo au tute vanga hnehna chang thei niah ka inngai," tiin a sawi a, a hmabak a hautak zui dawn tih a sawi bawk.

Grand Slam bikah Novak hi vawi 370 a chak tling ta chiah a, inelna liana hnehna chan tam lamah Roger Federer a kalsan ta chiah, a match lehpekah chuan Taylor Fritz hnehtu Casper Ruud a hmachhawn leh ang

Serbian star tan kumin French Open hi a pawimawh zual, season a hman ṭhat loh avangin number 1 a nihna pawh hloh mai thei dinhmunah a ding mek. Number 1 ni chhunzawm zel tur chuan Paris khawpuiah hian final a thlen ngei a ngai.

Zverev a tlang

Tennis match hi chu a rei zawng sawi lawk theih a ni lo a, an hmaa mite an inkhelh rei chuan a dawta mite ṭan hun a tlai thei bawk. Alexander Zverev-a'n hnehna a chan meuh pawh khan France ramah chuan Thawhṭanni zan dar 1:40 a ni daih.

German tlangval hian darkar li leh minute 40 chhungin Holger Rune a hneh a, a vawi khat nana major title lak a tumna chu a la nung zel - a hmabakah Alex de Minaur a nih dawn avang erawh chuan a hautak hle ang.

Zverev hian a ball vuak na leh service ṭha tak a chhawr ṭangkai a, a service hmasa aṭanga 76% zetah point a hmu. Clay-ah ball kal muangin sawt kang sang deuh mah se a nghet ṭha hle a, a chakna chhan hi a hman thiam chhunzawm a pawimawh dawn hle.

Last 16 inkhel dangah De Minaur hian Daniil Medvedev chu 4-6, 6-2, 6-1, 6-3 in a lo hneh ve thung a, a ṭum khat nan French Open quarterfinal a lut - Australian mipa zingah Lleyton Hewitt (2004) hnua French Open quarterfinal lut leh thei hmasa a ni.

Medvedev hi seeded pangana a ni a, atan chuan clay court-a inkhelh hi a harsa ṭhin a ni - mipa seeded sang zinga tla hmasa ber a ni a, set hnihna an khelh laia hliam tenau a neih avangin a duhthusam angin a khel chhuak thei lo bawk.