Duhthusam a thleng dik - Mbappe

Kylian Mbappe chua Real Madrid a zawm thei chu a duhthusam a thleng dik tih a sawi, a naupan lai aṭanga a club ṭan leh ngaihsan em em tan a khel thei dawn ta tihna a ni a, atan chuan a lawmawm hle ang tih a chiang.

France captain hian Paris Saint Germain tana contract a hman zawh hnuah Spanish club lian hi a zawm a, phochhuah la ni chiah lo mah se inremna an ziak fel tawh. Club leh player hian an inrem tih hi an tarlang tawh a ni.

Duhthusam

Instagram-ah Mbappe hian a naupan lai thlalak a pho chhuak a, chutah chuan Real Madrid jersey hain a thlalak sawifiah nan hian a duhthusam a thleng dik ta tih a ziak lang tel bawk.

Kum 25 mi Mbappe chuan, "Duhthusam a thleng dik ta, ka club ṭan leh duhthusam Real Madrid ka zawm thei a, tuna ka hlimna ang hi midang tan hriatthiam ve theih chi a ni lo ang.

"Madrid ṭantu mipuite nena inhmuh hlan ka nghakhlel tawh a, hetiang taka min thlawpna thu ka dawn hnem avangin ka lawm bawk... Hala Madrid," tiin a ziak. La Liga champion tan season tharah a khel dawn ta a ni.

Real hmatawng

Real Madrid hian Mbappe hma hian Brazilian forward Vinicius Jr leh Rodrygo te bakah lei thar Endrick, England midfielder Jude Bellingham te an nei sa tawh a, tunah Mbappe an neih leh tak avangin tlarhma lam an hraw dawn hle.

Season liam ta khan Mbappe hian PSG tan inelna hrang hrangah match 48 aṭangin goal 44 a khung a, tun hnai season ruk chhung chu Ligue 1 huanga goal khung hnem ber dinhmun a luah hial.

PSG tan Ligue 1 nomawi pasarih bakah French Cup vawi li a lakpui a, an ram chhunga nomawi chawi theih hrang hrang a chawi kim a, mahse a duh ber Champions League-ah erawh a la champion thei tih lo.

UCL beiseina

Footballer zingah Champions League nomawi chawi chak lo an awm lo ang - player dangte ang bawkin Mbappe hian UCL title lak a chak; PSG tana a khelh laiin final thleng ve mah se nomawi inchuhna inkhelah Bayern Munich an ngam lo a ni.

A club thar Real Madrid erawhin Borussia Dortmund hnehin a vawi 15 nan UCL nomawi an chawi hlim hlawl a ni thung. Carlo Ancelotti naute hian La Liga chauh ni loin UCL boruak hi an ngam em em a, champion duh tan chuan anni aia zawm châkawm hi an awm thei lo ang.

An ram France tan World Cup a champion tawh a, mimal chawimawina sang Ballon d'Or erawh a la dawng lo. Real Madrid aṭangin chona thar a hmachhawn dawn a, nomawi bakah Ballon d'Or kawng a hnai sawt tura ngaih a ni bawk.

An lo lawm

Real Madrid hian player thar an neih chuan Santiago Bernabeu Stadium-ah ropui takin an pho chhuak a, a hmunah fans tam tak an pungkhawm ṭhin - Mbappe tan pawh hetiang hun hi tun kar chhunga an buatsaih hman a rinawm.

IG leh X (Twitter ni ṭhin) lamah Spanish club lian hian Mbappe-a chetla lai video dah chhuakin, 'Kan lo lawm a che' tih an ziak tel a, social media lamah chuan an player tham lawmna thu an tarlang der tawh a ni.

Tunah chuan Mbappe hi Euro 2024 khel turin France tan a inbuatsaih mek a, a club thar hian lawmluhna hun an buatsaih dawn a nih erawh chuan hun a nei thei tura ngaih a ni a, an phochhuah hun tur tak erawh puan chian a la ni rih lo thung.