Argentina coach Scaloni a nghet

World champion an nih hnu deuh lawkah Argentina coach Lionel Scaloni chuan a hna ngai a thawk chhunzawm zel dawn em tih a sawi chiang thei lo a, tunah erawh Copa America an khelh turah a rilru zawng zawng a seng tih a sawi.

Nikum November thla khan Argentina hian 2026 World Cup qualifier-ah Brazil chu 1-0 in an hneh a, an chak hnuah Scaloni hian a hna kalsan a rilruk thu a sawi, tun hnaia chanchinbu mite a kawmna thar berah erawh ram tan 100% a pek thu a sawi thung.

Kum 46 mi Scaloni chuan, "A nihna tak sawi chuan nikum kha ka tan hun ṭha a ni hran lo a, ka taksa a chauin ram tan ka tih tur ka ti ṭha tawk loah ka ngai, tunah erawh nikum November thla boruak nen a inang tawh lo.

"Kan ram football thuneitu lamin min duh chhung chu team ka enkawl ang," a ti. Argentine Football Association (AFA) president Claudio Tapia leh a thawhpuiten an ban a nih ngawt loh chuan chawlh a tum rih lo.

June 20 aṭanga July 14 chhung hian Copa America khelh a ni dawn, tournament khelh turin Lionel Messi a dam ṭha tawk tih a sawi a, hetih lai hian Paulo Dybala a koh loh chhan a sawifiah bawk.

Scaloni chuan, "A hliam a dam hnuah Lionel Messi chuan Inter Miami tan ṭha takin a khel thei leh tawh a, a tirah khel tlem deuh mah se tunah chuan match a khel tluan thei tawh," a ti a, nimin khan Messi hian an ram squad a zawm.

Dybala chungchang sawi zuiin Scaloni chuan, "Dybala hi player ṭha tak, ram tana inpe tak a ni bawk. Chutihrualin mimal chauh kan en thei lo a, team tana ṭha ber tur anga thutlukna kan siam a ngai," a ti.

Argentina hi Copa America group A-ah Canada, Chile leh Peru te nen an awm khawm, an match hmasa ber atan June 20 hian Canada an hmachhawn ang. Chumi hmain inbuatsaih nan Ecuador leh Guatemala te an hmachhawn ang.