India inlan hun a thleng ta

Zanin dar 8:00 hian T20 Cricket World Cup-ah India an inlan dawn a, Ireland nen an inhmachhawn ang. Nassau County International Cricket Stadium, New York-ah an inkhel dawn a, helai hmun tho hi June 9, Pathianni zana India leh Pakistan inkhelhna tur a ni.

India hi champion rinkai ni ṭhin mah se a tawp an khar ṭha ṭhin lo a, T20 World Cup-ah phei chuan kum 2007 hnuah an champion tawh lo. Captain Rohit Sharma pawh kum 37 mi a ni tawh a, a hun hnuhnung lam a nih tawh avangin nomawi chawi hi a pawimawh lehzual.

Khaihin ila

Kum 2007-a India-in nomawi an chawi kum khan catpain MS Dhoni chu kum 26 mi chauh a la ni a, Rohit Sharma pawh kum 20 mi chauh a la ni a, Piyush Chawla chu kum 18 mi chauh niin a tel bawk. Tun ṭumah erawh captain Rohit hi kum 37 mi a ni tawh a, kum naupang ber Yashasvi Jaiswal pawh kum 22 mi a ni tawh.

An champion kuma an kum chawhrual hi kum 23 leh thla sarih vel a nih laiin kumina an squad kum chawhrual erawh kum 30 leh thla khat a ni pha daih. Kum aṭanga teh chuan kumin squad hian tawnhriat an nei ṭha zawk tihna a ni.

Tu nge khel dawn?

IPL an khel zo chiah a, India kawr hak phak hrim hrim a harsa. Bul ṭantu zinga tel a harsa lehzual dawn. Captain Rohit Sharma chu chiang sa a ni a, Virat Kohli pawh hmaih theih an ni lo.

Rohit hi Yashasvi Jaiswal nen bul an ṭan a rinawm a, Kohli hi pathumnaah an awm ang. Bowling lamah Jasprit Bumrah chu innghahna tur a ni leh dawn a; Axar Patel, Kuldeep Yadav, Arshdeep Singh leh Mohammed Siraj te an awm bawk.

Chennai Super Kings star Ravindra Jadeja leh Shivam Dube te Ireland lakah an khelh a rinawm loh zawk. Rohit Sharma (c), Yashasvi Jaiswal, Virat Kohli, Suryakumar Yadav, Rishabh Pant (wk), Hardik Pandya, Axar Patel, Kuldeep Yadav, Arshdeep Singh, Mohammed Siraj leh Jasprit Bumrah te chu bul ṭan tur chu beisei a ni.

India aiawh hian tu pawh khel se, Ireland lakah chuan chak tura chiang ngaih a ni. Tun ṭum inkhel hi Men in Blue tan Pakistan nen an inkhel tur atana inbuatsaihna ṭha tak a ni ang.