Chelsea coach atan Maresca a chiang ta

Premier League club Chelsea chuan coach thar atan Enzo Maresca an lakluh thu an puang ta - Leicester City boss hlui hi London club hian an la lut dawn tih a chianna a rei tawh a, official taka puanzarna erawh a awm lo reng.

Mahse, Thawhṭanni zan khan Maresca lakluh a nih thu puan a ni ta a, kum 44 mi coach hian club lian a la enkawl ngai loh avangin Chelsea fans tan a laka beisei neih dan thiam a harsa ang.

Kum 44 mi coach hian kum nga chhung atan contract a ziak a, kum khat dang pawhsei theihna dan a tel bawk - Maresca tawnhriat neih tlem ngaihtuah chuan Chelsea hi an 'huai' tih loh rual a ni lo a, contract an pe rei hle.

Maresca hoin Chelsea hian an ropuina neih let leh an tum dawn a, mahse, an elpuite hi Arsenal, Manchester City, Manchester United, Liverpool leh Tottenham Hotspur te an nih avangin a awlsam lo ang.

A palina

May 2022 khan Chelsea hi American sumdawng hausa Todd Boehly leh a thawhpuiten an lei a, player lei nan sum tam tak an seng a, transfer policy mumal a awm lo em ni chu aw, tih tur khawpin player an lei nasa.

Tute emaw ngaihzawng thlak zing ang mai an ni a, coach lam pawh an thlak ngun! Boehly thuhnuaia club a awm hnuin coach pali an neihna chiah a ni a, Maresca hian May 21-a club chhuahsantu Mauricio Pochettino a thlak.

Maresca chuan, "Khawvela club lian ber pawl Chelsea zawm hi coach tam tak duhthusam a ni a, kei pawh he hun ṭha ka nei thei hi ka lawm hle a ni.

"He club-in hlawhtlinna a lo neih tawh ṭhinte chhawm nung a, fan-te hlimna thlen tura player leh staff ṭha tak tak ka thawhpui tur hi ka lawm takzet," a ti a, Chelsea-ah hlawhtlin a inring hle.

Lung a leng lo!

Chelsea hian season liam taah khan Poch hoa team ṭha tak din an tum a, an beisei anga awlsam erawh a ni lo. Premier League-ah tluk leh din an fawm a, mahse, season tawp lamah he team hi insiamremin, fans tam takin Poch lam an hawi leh tawh.

London club hian an league match tawp lam pangaah hnehna chang vekin, parukna ni chungin season an khar a, Carabao Cup final lutin, FA Cup-ah semifinal an lut bawk a, an player hralh leh lei dan en chuan Poch-a'n hna a thawk chhe hran lo niin a lang.

Mahse, Chelsea thuneitute leh Poch inkawm zuiin, an thu a inhmu thei lo a, a tawpah Argentine coach hi a bang. Poch chhuah hnuah Blues-in coach an zawng a, Maresca bakah Brighton & Hove Albion chhuahsantu manager Roberto de Zerbi, Ipswich Town boss Kieran McKenna leh Brentford coach Thomas Frank te hming lam rik a ni.

A tawpah erawh Championship-a Leicester City champion puitu Maresca-in an lung a len ber a, Chelsea co-sporting directors Paul Winstanley leh Laurence Stewart chuan, "He hna chungchanga kan indawrnaa a thusawite chuan mi a hneh em em a ni," an ti.

Hmabak

Maresca hian July 1 aṭangin Stamford Bridge-ah hian hna a thawk ṭan nghal dawn a, Leicester City lama a coaching staff-parukten an zui a, Chelsea goalkeeper hlui Willy Caballero pawh a coaching staff zingah hian a tel.

Assistant coach Caballero bakah hian Danny Walker, Michele De Bernardin, Marcos Alvarez, Javier Molina Caballero leh Roberto Vitiello te chuan Stamford Bridge an pan ve bawk a, an pu hnung an zui zel.

Chelsea player, international football khel lote chu July 4-ah club-a kir tura beisei an ni a, pre-season tour atan an inbuatsaih nghal ang - Blues hian USA-ah season lo awm tur atana inbuatsaihna an nei dawn.

London club hian Welsh club lar Wrexham, Scottish club ropui Celtic, Mexican club ṭha Club America, Manchester City leh Real Madrid te an inkhelhpui ang.

Sulhnu

Sporting director pahnih Winstanley leh Stewart bakah club neitu zinga mi Behdad Eghbali te chu Chelsea coach thar ruai tura ngaihtuahna seng ber an ni a, Maresca an lakluh chhan langsar tak chu an kalphung thlak an tum nen inmil tura an ngaih vang a ni.

Chelsea hian data leh sports science thiamna hmanga team hi kaihhruai an duh a, department thar a awm nual dawn. Player lakluhah pawh coach inrawlh lutuk loa siamrem an tum a, hei hi Pochettino nena an inrem theih lohna langsar zingah a tel.

Maresca chuan Chelsea ruahmanna hi a pawm thlap a, hmasawn tura player puih a, inkhelh ringawta rilru pek chu a duh dan a ni. Maresca hian Chelsea data department lam chu player profile zirchian turin a dil vek tawh a, academy lama star player leh club staff ṭhenkhat thlengin a zirchiang.

Italian coach hian pre-season tour-ah academy player a hruai nual a rinawm a, Manchester City boss Pep Guardiola nena an lo thawh dun tawhna chu Chelsea thuneitute hmintu pakhat a ni a, Pep ang thoa a hlawhtlin theih an beisei.

Tu nge Maresca?

Kum 44 mi Maresca hian Italian second division club Ascoli aṭanga a coaching career zawh ṭanin, kum 2017 khan assistant coach a ni. August 2020-ah Manchester City academy a zawm a, Under-23 chu a season hmasa berah Premier League 2-ah a champion pui.

City U23 a champion pui hnu hian Serie B club Parma a zawm a, mahse, player langsar Gianluigi Buffon leh Franco Vázquez te a nei chungin playoff takngial pawh a thlenpui phak lo a, ni 180 chiah a cham hman tihin an ban.

June 2022 khan City-ah bawk a kir a, Pep Guardiola hnuaiah assistant coach a ni. English club-in treble nomawi an chawi theih nana coaching staff thawhhlawk zinga mi a ni a, level sanga champion awmzia a hria.

Season hmasa ṭan dawn khan Leicester a zawm a, Premier League aṭanga tla hlim Foxes hi season khat bak Championship-ah hun a hmanpui lo - English second division champion a nihpui a, Premier League-ah a hruai kir. Chelsea fan-ten beiseina sang tak nen an thlir ang.