September-ah Joshua-a'n inhnek hmachhawn dawn

British boxer rothap Anthony Joshua chuan September-ah inhnek hmachhawn turin hma a la mek a, amah ang thoa British mi Daniel Dubois nen an inhnek a rinawm.

Ruahman dan chuan Joshua hi September 21-ah inhnek hmachhawn tura ngaih a ni a, kar hmasa Inrinni pawh khan Dubois-a'n Filip Hrgovic a hnehna inhnek chu Saudi Arabia-ah a en.

Kum 26 mi Dubois hian IBF ‘interim’ title fight-ah hian round riatnaah hnehna a chang a, IBF dan ang chuan undisputed heavyweight champion ni lai Oleksandr Usyk hmachhawn tur a ni.

Mahse, Ukrainian boxer hian December 21-ah a hneh tak Tyson Fury nen rematch an nei dawn a, IBF dan anga 'mandatory challenger' Dubois hi a hnek hmasa lo a nih chuan IBF title hi hloh thei a ni.

Mahse, Usyk hian IBF hnenah hian a kawnghren chu hlihsak lo turin a ngen a, Fury nen undisputed champion ni leh tura inel leh phawt a duh. IBF hian Usyk-a ngenna hi an pawm lo a nih chuan Dubois-a hnenah kawnghren hi an hlan dawn a, chuti a nih chuan Dubois leh Joshua inhnek hi title fight a ni zui thei ang.

Kum 34 mi Joshua hian WBA (Super), IBF, WBO leh IBO title lo kawl tawh ṭhinin, Usyk lakah hian a chân a, Ukrainian boxer nen hian rematch nei leh mah se, split decision-in match hnihnaah a tlawm leh tho.

Mahse, Joshua-a'n Usyk a ngam loh hnuah a insiamrem leh tawh a, match li a zawna chakin, heng zinga match thumah hian point lo vekin a chak - Dubois pawh hian August 2023 khan Usyk hi a lo ngam lo ve tawh tho a, mahse, hemi hnuah hian match hnihah a chak ve leh ta.

Dubois hian Jarrell Miller leh Hrgovic hmachhawna hneh ve vein, Hrgovic lakah rin hlawh lo zawk ni chungin a chak - tunah Joshua nen sawizawm an ni a, Dubois promoter Frank Warren chuan inbiakna hi a kal mek thu a sawi.