McKenna chungah kan lawm - Ipswich Captain

Ipswich Town captain Sam Morsy chuan Premier League hruai thlengtu manager Kieran McKenna-a'n an club-a cham a thlan avanga player-te an lawm thu a sawi a, a hoa English top flight league an hmachhawn tur chu a phur hle.

Kum 38 mi McKenna hian Ipswich hi a zawnin Championship leh Premier League a hruai kai a, kum 22 hnua top flight league khel tura a hruai kir avangin Ispwich fan-te chuan an ngaihzawn rawn.

Mahse, Manchester United assistant coach hlui hnathawh hi club langsar ho pawhin an lo hmu ve reng a, an hnena thlem luh an duh. Chelsea leh United chu hming ri ring zual an ni a, mahse, McKenna hian chhuah aiin cham a thlang.

Northern Irish mi coach hian Portman Road-ah kum li atan contract a ziak a, kum khatah pound maktaduai thum vel a hlawh dawn niin British media-te chuan an tarlang.

Ipswich captain Morsy chuan, "McKenna chelh theih hi a pawimawh takzet. Club lian zawkah a kal dawn angin thawm kan hre reng a, mahse, chu pawh lo thleng ta se, sulhnu ropui tak chu a hnutchhiah tawh tho.

"Kan kianga a zinkawng a zawh chhunzawm tur hi a lawmawm takzet a, a tawpah chuan amah pawhin he club kal zelna tura a mawhphurhna lenzia a hmu niin ka hria. He club-a a cham zel tur hi kan lawm hle a ni," a ti.

McKenna hian December 2021 aṭang khan Ipswich hi enkawl ṭanin, season tluan a enkawl hmasak berah League One aṭangin Championship a kaipui a, English second division-ah season khat chiah hmanga pahnihna niin, Premier League a hruai thleng leh thei a ni.