Reina-a'n inkhelh chawlhsan a la tum lo

Kum 41 mi ni tawh mah se Pepe Reina-a'n inkhelh chawlhsan a la tum lo a, a career a mangṭhana tur a la thlir thu a sawi - Liverpool keeper hlui hian season hman zawh tak kha Villarreal-ah khelin, tun nipuiah a chhuahsan.

Mahse, Reina hian inkhelh chawlhsan mai a tum lo. Spain tana vawi 36 inlan tawh keeper chuan, "Kan thil tawn ho tam tak avang khan inthlah mai a harsa a, Villarreal hi ka in a ni reng tawh dawn.

"Mahse, tunah chuan ka zinkawnga ka hun tawp ka mangṭhana tur hmun ka zawng dawn a, ka inpeihin ka phur em em a ni," a ti a, career a mangṭhana tur club zawn a, inkhelh leh phawt a la duh.

Spanish keeper hian kum 2022 khan Villarreal hi a zawm a, a career-a competitive match 1,000 a khelh tlinna hmun niin, a zawm kum hian match 32 a khel a, season hmasa khan match 11-ah a inlansak.

Barcelona academy aṭanga inzir chhuak Reina hian 2002-2005 inkarah khan Villarreal tan a lo khel tawh a, hemi hnuah hian Liverpool, Napoli, Bayern Munich, Napoli, AC Milan leh Aston Villa tan a khel tawh bawk.

Premier League Golden Glove vawi thum dawng tawh keeper hian Reds tan a khelh laiin FA Cup, League Cup, FA Community Shield leh UEFA Super Cup-ah te nomawi a chawi a, Napoli chu Coppa Italia-ah champion puiin, Bayern Munich tan Bundesliga nomawi a chawi.

World Cup 2010-a Spain an champion ṭum khan squad-ah a tel a, Euro 2008 leh 2012-ah champion nomawi a chawi bawk.