India vs Kuwait: Chhetri-a'n a match tawp ber khel dawn ta
Mi tam takin Indian footballer piang tawh zinga ropui bera an chhal Sunil Chhetri chuan ram tan a match hnuhnung ber a khel dawn ta - India chuan zanin dar 7:00 hian FIFA World Cup 2026 qualification (AFC) second round-ah Kuwait an mikhual ang.
Chhetri hian May 16, 2024 khan India tana inkhelh a chawlhsan tur thu a puang a, zanina Kuwait nena an inkhel tur hi Blue Tigers legend tan a match hnuhnung ber tur a ni dawn - India tan chak a ṭul!
India captain hian, "Match khat chauh ka tan a awm ta a, kan vai tan hnehna chan tum ang aw - chutiang chuan hlim takin he game hi kan thlah thei ang," tiin a lo sawi tawh a, zaninah chak ngeia India jersey thlah a duh dawn.
Blue Tigers tan zanin chak hi World Cup qualifier third round luh nan a pawimawh a, legend Chhetri thlah nan chak tluka hlu a awm chuang lo bawk ang - heng zawng zawng infawmkhawm nen hian India an inlan dawn e.
Hmabak hautak
India hi qualifier second round-ah group A-ah awmin, Qatar, Afghanistan leh Kuwait te nen an awm ho a, match hmasa berah team ṭha Kuwait chu 1-0 a an hneh nghal avangin beiseina a sang hle.
Kuwait hi khualmualah an hneh a, Qatar hneh harsa dawn mah se, Afghanistan chu Blue Tigers tan 'point box' ni tura ngaih an ni a, mawlmang taka chhut pawhin India tan third round luh hi harsa lo tura ngaih a ni.
India hian Kuwait an hneh hnuah Qatar chu 3-0 in an ngam lo a, hei chu thil thleng ve awm rengah ngaih a ni. Mahse, March international break-ah khan Afghanistan nen match hnih khelin India-in point khat chiah an hlawh chhuak a, a pawi zo ta!
Point ruk hmuhna tur team nia ngaih lakah India-in point khat bak a hmu lo a, a hmabakah Kuwait leh Qatar an awm bawk si! Group A-ah India hi pahnihna la ni mah se, Afghanistan nen point li ve ve an nei a, Kuwait-in point thum an nei bawk - tlang turin zaninah chak ngei ngei a ngai.
Bang rawh se!
Afghanistan laka an tlawm ṭumin India fans tam tak an lungawi lo a, coach Igor Stimac chu bang turin an nawr nasa hle. Fan-te hi, "Stimac bang rawh se..." tiin an au rual a, Croatian coach-in team bus a luh dawn thlengin an au el.
Mahse, Stimac hian June 2026 thleng contract a nei a, India hian ban ta se, vaibelchhe ruk vel thlenga zângnadawmna pek a ngaih theih dan a awm. Hei vang hian Croatian coach hi an ban ngam lo a, a ban an nghak a ni ber!
Chutihrual chuan Stimac hian World Cup qualifier third round-ah India a hruai thleng lo a nih chuan a ban tur thu a sawi a, hei vang hian Croatian coach hian ban a duh pawhin mualpho taka chhuah loh a duh dawn.
Hetihrual hian Stimac-a contract-ah hian third round-a India a hruai thleng a nih chuan, kum hnih dang a contract pawhsei theihna dan a awm a, India hi zaninah a chakpui a nih chuan kum 2028 thleng Blue Tigers a enkawlna chance a sang hle.
India an inpeih
Stimac-a'n, "Tun hnai kum 30 chhunga India match pawimawh ber a ni," tiin a sawi hial a, an chak chuan India-in a vawi khat nan World Cup qualifier third round an luhna kawng a inhawng zau sawt dawn a, a awm lo hran lo.
India tan tlarhmaah Sunil Chhetri chu mal tlat tura ngaih a ni a, a hnung chiahah Brandon Fernandes dingin, mual sirah AIFF Player of the Year Lallianzuala Chhangte leh Mahesh Singh ten an thlawp ang.
MA exam vanga Lalengmawia Ralte (Apuia) a inlan theih loh avangin defensive midfield-ah Jeakson Singh leh Anirudh Thapa an inkawp a rinawm a, tlarhnung laiah Subhasish Bose leh Anwar Ali inkawpin, mual sirah Jay Gupta leh Nikhil Poojary te ding tura ngaih an ni.
Si ban nghak tur chuan Gurpreet Singh Sandhu bawk hi rin hlawh tura ngaih a ni a, khualmuala an hneh tawh Kuwait laka hnehna chang turin India an ṭha tawk.