Sakhming dai lo tur Sunil Chhetri

Sunil Chhetri-a'n India tana inkhelh a chawlhsan thu a puan meuh chuan Indian football a sawi nghing lawih a, ISL club mai ni lo, cricket inelna IPL club-te meuh pawhin Chhetri an uina leh lawmpuina thu an ziak kur ngei nguai a, India legend an thlah.

Zaninah Kuwait leh India an inkhel ang a, Chhetri-a'n ha leh ngai tawh lo turin India jersey a hlip ang - 'Captain Fantastic' tih meuha fan-ten an koh ṭhin Chhetri chuan Blue Tigers a thlah dawn ta!

Chhetri hian June 12, 2005 khan ram tana a match hmasa ber khelin, Pakistan a hmachhawn a, goal a khung nghal. Mak ve angreng tak chu Chhetri hian ram tana a match 50-na, 100-na leh 150-naah te goal a khung vek!

Kum 39 mi striker hian ram tan match 150 khela goal 94 khungin, international football-a goal khung tam palina a ni phak a, a tluk lohte hi Cristiano Ronaldo, Iranian legend Ali Daei leh Lionel Messi te chiah an ni.

Mahse, kum 39 zet a ni tawh a, mi tam takin heti zat kumah chuan ram tan mai ni lo, club tan pawh inkhelh an chawlhsan tawh ṭhin. Chhetri erawh India-in a mamawh a, kum 40 kai dawn thlengin ram tan a khel.

Chhetri chuan, "Ka thinlung chhungrila thathona hi chuan inkhel reng turin min duh a, mahse, ngunthluk tak leh puitling taka ngaihtuah chuan duhtawk a hun ve ta a ni," a ti a, international football a chawlhsan chhan a lo sawi tawh.

AIFF Player of the Year-a vawi sarih zet thlan tawh Chhetri-a'n ram tana goal a khung hnem ber kum chu kum 2011 niin, match 18-ah goal 13 a khung a, a uai thla ve ta tih pholangtu chu kuminah match nga khelin goal khat a khung.

Club lamah chuan Chhetri hian City Club Delhi tan bul a ṭan a, Mohun Bagan, JCT, East Bengal, Dempo, Chirag United, Churchill Brothers leh Bengaluru tan a khel a, Indian football-a nomawi chawi tur ang chu a chawi kim a, mimal lawmman langsar pawh dawn loh a nei lo.

Chhetri hian Major League Soccer club Kansas City Wizards leh Portuguese club ṭha Sporting Lisbon tan a khel tawh a, Championship club Queens Park Rangers-in lakluh tum mah se, Britain sorkar aṭanga work permit a hmuh theih loh avangin a khel lo thung.

Kansas City-ah hian league match-ah inlan lo mah se, friendly match-a Manchester United nen an inkhelh ṭumin a inlan a, reserve team tana a khelh ṭumin Evansville lakah hattrick a siam bawk. Sporting lamah pawh B team tan second division a khel a, Indian player zinga khawmualpui pathuma khel hmasa ber a ni.