Lianzuala a inpeih

India-in probable squad a puan khan Mizo pasarih ngawt an awm a, Lallianzuala Chhangte, Lalengmawia Ralte, Lalchungnunga, Isak Vanlalruatfela, Edmund Lalrindika, David Lalhlansanga leh Lalrinzuala te an ni.

Apuia'n exam a neih avangin kohna a chhang lo a, Isak leh Aizawl FC forward Rinzuala ten hliam vangin squad an zawm lo bawk. India kohna chhang zawng, Mizo palite final squad-ah an tel vek a, Lianzuala chu a langsar ber a ni.

Kuwait laka bul ṭan tura beisei Lianzuala chuan, "Kan inbuatsaihna a ṭha a, kan inpeih viau tawh e. Pathian zarah hnehna pawh chan ngei pawh kan inbeisei.

"Mahse, a hma ang thoin dawhtheih a ngai dawn - team ṭha tak an ni a, chance kan pek a, hmun ruak an neih chuan, min hrem nghal thei turin player an nei ṭha. Chuvangin inringtawk tak leh rilru fim tak pu chunga kan khelh a ṭul," tiin Vanglaini a hrilh.

Lianzuala hian season hman zawh takah khan Mumbai City tan inelna hrang hrangah match 34 khelin goal 11 a khung a, assist vawi sarih a nei. ISL bikah match 25 khela goal 10 khungin, assist vawi ruk a nei a, Indian player zingah ISL-a season khat aia tam goal 10 khung tling thei awm chhun a ni.

AIFF Player of the Year ni lai LZa hian ram tan match 36 khel tawhin, goal sarih a khung a, assist vawi hnih a nei. Tun India squad-ah Sunil Chhetri tih loha ram tana goal khung hnem ber Manvir Singh nen an ni.